BAKI, AzerVoice
İsrail Baş naziri Benyamin Netanyahunun yaxın çevrəsindəki məsləhətçilərin dövlətə məxsus məxfi məlumatları qanunsuz şəkildə ölkə xaricinə çıxararaq yaymaları səbəbilə istintaqa cəlb edildiyi bildirilib.
AzerVoice xəbər verir ki, bu barədə İsrail mətbuatı məlumat yayıb.
İsrailin daxili təhlükəsizlik orqanı Şin Bet və polis qüvvələri, sözügedən şəxslərin evlərində axtarış aparıb, sənədlərə və rəqəmsal daşıyıcılara əl qoyub.
Baş nazirlik Ofisindən sızdırılan bəzi sənədlər, HƏMAS ilə aparılan girov danışıqlarını sabotaj etmək, ictimai rəyi yönləndirmək və danışıqlar prosesini çətinləşdirmək məqsədilə təhrif edilib.
İddianaməyə əsasən, Netanyahunun müşavirlərindən biri olan Yonatan Uriç, keçmiş hərbi sözçü Eli Feldşteyn və Netanyahunun “ictimai razılıq məsləhətçisi” kimi tanınan Srulik Einhorn ilə birlikdə fəaliyyət göstərib.
Uriç hərbi senzura tərəfindən yayımlanması qadağan edilən məlumatları xarici media qurumlarına ötürmə planı hazırlayıb. Uriçin məqsədli şəkildə dövlət təhlükəsizliyinə zərər yetirə biləcək məlumatları yaymaq üçün fəaliyyət göstərdiyi qeyd olunur.
Belə ki, məlumatların media vasitəsilə nəzarətli şəkildə sızdırılması nəticəsində ictimai rəyin istiqamətləndirilməsi və siyasi təzyiqin artırılması hədəflənib. Həm Uriçin, həm də Feldşteynin bu prosesdə koordinasiyalı şəkildə hərəkət etdiyi vurğulanıb.
Prokurorluq, Yonatan Uriçin istintaqa mane olmaq məqsədilə sübutları yox etməyə cəhd göstərdiyindən şübhələndiklərini bildirib. Paralel olaraq, Netanyahunun korrupsiya işi üzrə təqibini aparan Baş prokuror Baharav-Miara ilə baş nazir arasında ciddi fikir ayrılıqları olduğu və Netanyahu tərəfdarlarının onun vəzifədən uzaqlaşdırılmasına çalışdığı da qeyd olunub.
