BAKI, AzerVoice

Böyük Britaniya iki dövlətli həllə sadiqliyini təsdiqlədi - Yaxın Şərqdə sülhün alternativi yoxdur.

AzerVoice xəbər verir ki, Böyük Britaniyanın baş naziri Keir Starmer İsrail-Fələstin münaqişəsində davamlı sülhün yalnız iki dövlətli həll yolu ilə mümkün olduğunu bildirib.

O, bu fikirləri Fransa prezidenti Emmanuel Makronla Londonda keçirdiyi birgə mətbuat konfransında səsləndirib.

Görüş zamanı Starmer qeyri-qanuni miqrasiyanın hər iki ölkə üçün böhran olduğunu vurğulayıb və yeni miqrasiya siyasətinin tətbiq ediləcəyini açıqlayıb. Onun sözlərinə görə, qanunsuz yolla İngiltərəyə daxil olanlar Fransaya geri göndəriləcək, əvəzində isə təhlükəsizlik yoxlamalarından keçmiş şəxslər qanuni yollarla ölkəyə qəbul olunacaq.

Baş nazir həmçinin Böyük Britaniya və Fransanın peyk texnologiyaları, süni intellekt və enerji təhlükəsizliyi sahəsində əməkdaşlığını dərinləşdirdiyini, Ukraynaya dəstəyin isə davam etdiriləcəyini qeyd edib.

“Britaniya xalqının təhlükəsizliyi Ukraynadan başlayır”, – deyə o bildirib.

“Hazırda yardımların çatdırılması və girovların azad olunması prioritetdir. Qəzzadakı vəziyyət tamamilə qəbuledilməzdir.” - deyə Qəzza zolağındakı humanitar vəziyyətə toxunan Starmer, bölgədə atəşkəsin vacibliyini vurğulayıb.

İşçi Partiyasının uzun müddətdir Fələstin dövlətinin tanınmasını dəstəklədiyini xatırladan Starmer bildirib ki, bu mövqe dəyişməyib.

Qeyd edək ki, Starmer və Makron, Avropa təhlükəsizliyinin təmin olunmasında Böyük Britaniya və Fransanın aparıcı nüvə gücləri kimi rolu barədə də ortaq mövqe ortaya qoyublar.