BAKI, AzerVoice
Qəzza zolağındakı münaqişə həll olunmayana qədər İsrailə doğru gedən və ya onunla əməkdaşlıq edən şirkətlərə məxsus gəmilərə qarşı hücumlar davam edəcək.
AzerVoice-un məlumatına görə, bu barədə Yəmənin “Ənsar Allah” (Husilər) hərəkatının lideri Əbdül Məlik əl-Husi bildirib.
“Bəzi gəmiçilik şirkətləri bizim qadağamızı pozmağa başlayıb və Umm ər-Rəşraş limanına (Əylat şəhərinin ərəb adı – red.) daşımaları davam etdirirlər. Onlar səhvən elə hesab edirlər ki, blokadanı görməməzliyə vurmaq olar. Lakin iki gəminin batırılması ilə nəticələnən əməliyyatlar göstərdi ki, İsrailə qarşı dəniz blokadası qüvvədə qalır və bu, Qəzzaya qarşı təcavüz sona çatana və anklavdan blokada qaldırılana qədər davam edəcək” – deyə, əl-Husi bəyan edib.
O xatırladıb ki, husilərin Qırmızı dəniz, Ədən körfəzi və Ərəb dənizi sularında İsrailin maraqlarına xidmət edən gəmiçilik şirkətlərini qadağan edən qərarı qüvvədədir və bu qadağa İsrailin Qəzzadakı hərbi əməliyyatları dayandırmadığı müddətcə davam edəcək:
“Qırmızı dənizdə baş verənlər açıq dərsdir: İsrailin maraqlarına xidmət edən bütün gəmiçilik şirkətləri sərt tədbirlərlə üzləşəcəklər.”
Qeyd edək ki, son günlərdə husilər Yəmən sahilləri yaxınlığında iki ticarət gəmisinə hücum edərək onları batırıblar. İyulun 6-da Yunanıstanın “Stem Shipping” şirkətinə məxsus “Magic Seas” quru yük gəmisinə hücum edilib. Gəmidəki 22 nəfərlik heyət BƏƏ-yə məxsus “Safeen Prism” gəmisi tərəfindən xilas edilib.
