BAKI,
AzerVoice
İsrail son 24 saatda Qəzzaya 180 hava zərbəsi endirib.
AzerVoice xəbər verir ki, İsrail
ordusu Qəzza zolağına son 24 saat ərzində 180 hava hücumu təşkil
edib.
Ordunun açıqlamasında hücumların Hərbi Kəşfiyyat İdarəsi (AMAN) və
daxili təhlükəsizlik xidməti Şin Bet (Şabak)-ın rəhbərliyi ilə
həyata keçirildiyi bildirilib.
Açıqlamaya görə, hava hücumları eyni vaxtda qurudan edilən hücumlara dəstək xarakteri daşıyıb. Hədəf alınan obyektlər arasında bubi tələsi yerləşdirilmiş binalar, silah anbarları, tunellər və tank əleyhinə rampalar olub. İsrailin 162-ci diviziyası Qəzzanın şimalında hərbi əməliyyatlarını davam etdirir, 401-ci briqada isə bir sıra tunelləri məhv etdiyini iddia edir.
Qeyd edək ki, 7 oktyabr 2023-cü ildən bu yana İsrailin Qəzza zolağına qarşı həyata keçirdiyi hücumlar nəticəsində 57 575 fələstinli ölüb, 136 879 nəfər yaralanıb. Bu qurbanların əksəriyyəti qadın və uşaqlardır.
Atəşkəsin pozulduğu 18 mart tarixindən bəri isə Qəzzada 7013 nəfər həyatını itirib, 24 838 nəfər isə yaralanıb.
Bundan əlavə, 27 maydan etibarən humanitar yardım bölgələrinə edilən hücumlar nəticəsində 766 nəfər ölüb, 5044 nəfər yaralanıb.
İsrailin baş naziri Benyamin Netanyahu Qəzza zolağının tam işğalını planladığını bəyan edib və ordu bu məqsədlə hərbi əməliyyatları genişləndirir.
