BAKI, AzerVoice
Fələstin BRİKS sammitində Qəzzada atəşkəs və İsrailin tam geri çəkilməsi çağırışını alqışlayıb.
AzerVoice xəbər verir ki, Fələstin Xarici İşlər Nazirliyi Braziliyanın Rio-de-Janeyro şəhərində keçirilən 17-ci BRİKS Liderlər Zirvə Toplantısında səsləndirilən “İsrailin Qəzza zolağından və bütün işğal olunmuş Fələstin ərazilərindən tamamilə çıxarılması və daimi, qeyd-şərtsiz atəşkəs” çağırışını yüksək qiymətləndirib.
Nazirlikdən yayılan bəyanatda həmçinin beynəlxalq ictimaiyyətə Fələstin xalqına qarşı soyqırım, hücumlar və məcburi köç kimi hərəkətlərə qarşı təcili tədbirlər görmək çağırışı edilib. Fələstin tərəfi münaqişənin “Ərəb Sülh Təşəbbüsü” və beynəlxalq hüquqa əsaslanan siyasi danışıqlar yolu ilə həllinin vacibliyini vurğulayıb.
Qeyd edək ki, sammitin ilk günündə yayılan birgə bəyanatda BRİKS ölkələri İsrailin Fələstin ərazilərindən tam çıxmasını və Qəzzada qeyd-şərtsiz atəşkəsin təmin olunmasını tələb ediblər. Bəyanatda Qəzza zolağının Fələstinin ayrılmaz hissəsi olduğu qeyd olunub.
