BAKI, AzerVoice
Serbiyanın paytaxtı Belqradın Slaviya meydanında minlərlə insanın iştirakı ilə genişmiqyaslı müxalifət etiraz aksiyası keçirilir.
AzerVoice xarici KİV-ə istinadən xəbər verir ki, aksiyanın əsas iştirakçıları tələbələrdir.
Etirazçılar mitinqdən təxminən 40 dəqiqə əvvəl meydana toplaşıb. Onlar Serbiya bayraqları və universitet fakültələrinin simvolları ilə çıxış edirlər. Nümayişçilər fit və vuvuzelalardan istifadə edirlər. Meydanda tələbələr arasından natiqlərin çıxış edəcəyi səhnə qurulub. Aksiyaya dəstək olaraq yüzlərlə motosikletçidən ibarət kolonna da meydana gəlib.
Mitinq başladıqda meydanda ab-hava canlı, lakin sakit olub. Ərazidə hüquq-mühafizə orqanlarının geniş iştirakı müşahidə olunmur. Yalnız yaxınlıqdakı küçələrdə nəqliyyatın hərəkətini tənzimləyən və avtomobillərin yürüş zonasına daxil olmasının qarşısını alan polis qrupları var. Ətraf küçələr bağlanıb.
Qeyd edək ki, tələbə etirazçılar artıq yeddi aydır ki, ali təhsil müəssisələrinin fəaliyyətini bloklayırlar. Onlar hakimiyyətdən növbədənkənar parlament seçkilərinin tarixini elan etməyi və Serbiya prezidenti Aleksandar Vuçiçin tərəfdarlarının parlament binası qarşısında qurduğu düşərgənin ləğv edilməsini tələb edirlər. Aksiyanın təşkilatçıları bildirib ki, ultimatum saat 21:00-da (Bakı vaxtı ilə 23:00) başa çatır və bu vaxta qədər tələblər yerinə yetirilməzsə, onlar vətəndaş itaətsizliyi tədbirlərinə əl atmağa hazırdırlar.
Serbiya Prezidenti Aleksandar Vuçiç daha əvvəl bəyan etmişdi ki, etirazlar ölkənin təhsil sisteminə və daxili sabitliyinə ciddi zərər vurub və onların xaricdən idarə olunduğunu iddia etmişdi. O, həmçinin iyunun 28-də axşam saatlarında etirazçılar tərəfindən zorakılıq aktlarının baş verə biləcəyini bildirmiş, lakin dövlət orqanlarının vətəndaşların təhlükəsizliyini təmin etməyə hazır olduğunu vurğulamışdı.
Məlumat üçün bildirək ki, 28 iyun Serbiyada əsas milli bayramlardan biri olan Vidovdan kimi qeyd olunur. Bu gün 1389-cu ildə Kosova düzündə Osmanlı imperiyasının Avropaya irəliləməsi yarım əsrlik müddətə dayandırılıb. Vidovdan serb milli kimliyi və tarixi yaddaşında xüsusi yer tutur və tez-tez siyasi aksiyaların fonuna çevrilir.