BAKI, AzerVoice
ABŞ prezidenti Donald Tramp bildirib ki, İran hakimiyyəti ABŞ ordusunun Tehranın nüvə obyektlərinə hücum planından son ana qədər xəbərsiz olub.
AzerVoice xəbər verir ki, Tramp bu brədə "Fox News" telekanalına verdiyi müsahibəsində danışıb.
“Biz onları xüsusi olaraq xəbərdar etmədik, onlar son ana qədər bizim hücum edəcəyimizi bilmirdilər” - deyə, Tramp vurğulayıb.
O, həmçinin qeyd edib ki, İranın hücumdan əvvəl nüvə obyektlərindən uran ehtiyatlarını çıxarması mümkün deyildi.
Tramp əlavə edib ki, heç kim ABŞ-ın Fordo nüvə obyektinə hücum edəcəyini təsəvvür etmirdi, çünki hamı onun keçilməz olduğunu düşünürdü.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.
