BAKI, AzerVoice

ABŞ kəşfiyyatı İsrailin “nüvə silahı” iddiasını təkzib edib.

AzerVoice xəbər verir ki, CNN kanalının ABŞ kəşfiyyatına istinadla yaydığı məlumata əsasən, İranın nüvə silahı hazırlamaq üzrə olduğu barədə İsrailin iddiaları həqiqəti əks etdirmir.

Kəşfiyyat hesabatına görə, İran bu istiqamətdə fəal səylər göstərmir və istəsə belə, silahın hazırlanması illərlə vaxt aparacaq.

İsrail rəsmiləri, o cümlədən Baş nazir Benyamin Netanyahu, İrana qarşı son hücumlarını Tehranın “nüvə silahı istehsalında dönüş nöqtəsinə yaxınlaşması” ilə əsaslandırmışdılar. Netanyahu hətta “əgər hücum etməsəydik, İran bir həftəyə nüvə silahı hazırlaya bilərdi” deyə iddia etmişdi.

Lakin CNN-in yayımladığı kəşfiyyat qiymətləndirməsinə görə, İran bu cür silah hazırlamaq niyyətində deyil və proqramın tam həyata keçməsi 3 ilə qədər çəkə bilər. Hesabatda bildirilir ki, İsrailin son hücumları İranın nüvə proqramını sadəcə bir neçə ay ləngidə bilər.

ABŞ müdafiə mənbələrinin qeyd etdiyi kimi, əsas obyektlərdən olan Fordo nüvə mərkəzi zərər görməyib. Ekspertlərə görə, bu obyektə ciddi zərbə yalnız ABŞ-ın xüsusi silahları və dəstəyi ilə mümkün ola bilər.

Qeyd edək ki, ABŞ-ın keçmiş yüksək səviyyəli rəsmisi Brett Makqurk “İsrail nüvə obyektlərinə zərbə vura bilər, lakin onları tamamilə sıradan çıxarmaq üçün ya ABŞ hərbi müdaxiləsi, ya da diplomatik razılaşma gərəkdir”- deyə bildirmişdi.

Əlavə olaraq, ABŞ-ın keçmiş kəşfiyyat rəhbəri Tulsi Qabbard mart ayında Konqresdə verdiyi ifadədə “İran 2003-cü ildən bəri nüvə silahı proqramına yenidən başlamayıb”- deyə bildirib.