BAKI, AzerVoice

İsrailin Baş naziri Benyamin Netanyahu, İsrailin müdafiə naziri Yisrael Katsın Tehran sakinlərinə yönəlik hədəsindən sonra “Tehranın təxliyə edilməsi” mesajını verib.

AzerVoice xəbər verir ki,Netanyahu, Tel Nof Hərbi Hava Bazasında keçirdiyi səfərdən sonra məsələ ilə bağlı açıqlama verib.

İsrail Hərbi Hava Qüvvələrinin “Tehranın hava məkanına nəzarət etdiyini” iddia edən Netanyahu, “nüvə təhdidini və İranın hərbi gücünü sıradan çıxarmaq məqsədində irəlilədiklərini” bildirib.

Netanyahu çıxışında “Tehran sakinlərinə şəhəri tərk etmələrini deyirik” ifadəsini işlədib.

Müdafiə naziri Kats isə daha əvvəl İranın cavab hücumlarında İsraildə mülki şəxsləri hədəf aldığını və bunun əvəzini Tehran əhalisinin ödəyəcəyini bildirmişdi.

Gələn reaksiyalardan sonra yazılı açıqlama verən Katz, “Tehran əhalisinə fiziki zərər vermək niyyətində olmadıqlarını” iddia edib.

Xatırladaq ki, İyunun 13-də İsrail İranın müxtəlif şəhərlərindəki nüvə obyektlərinə, eləcə də ordunun yüksək komandanlığına qarşı irimiqyaslı hücumlara başlayıb.

Hücumlarda İranın Baş Qərargah rəisi, İnqilab Keşikçiləri Korpusunun Baş Komandanı, bəzi yüksək səviyyəli komandirlər və 9 nüvə alimi həlak olduğu halda, mülki itkilərin ümumi sayının 224 olduğu açıqlanıb.

İran ordusunun İsrailə ballistik raketlərlə cavab verməsi nəticəsində 24 nəfərin öldüyü, 500-dən çox insanın yaralandığı bildirilib.

Başda Türkiyə olmaqla bir çox ölkə İsraili qınayıb.