BAKI,AzerVoice, Orxan Qədirzadə
İsrailin ifrat sağçı Milli Təhlükəsizlik naziri İtamar Ben-Qvir, ABŞ-nin Birləşmiş Millətlər Təşkilatının Təhlükəsizlik Şurasına (BMT TŞ) təqdim etdiyi Qəzzaya dair qərar layihəsinin qəbul edilməsi halında Fələstin rəhbərliyinə qarşı “hədəfli sui-qəsdlər” həyata keçirilməsi və Fələstin Dövlət Başçısı Mahmud Abbasın həbs olunması çağırışı ilə çıxış edib.
AzerVoice xəbər verir ki, Jerusalem Post qəzetinin məlumatına görə, Ben-Qvir Knessetdə (İsrail Parlamenti) rəhbərlik etdiyi Yəhudi Gücü Partiyasının qrup iclasında çıxış edərək ABŞ-nin təqdim etdiyi layihənin İsrail üçün təhlükə yaratdığını iddia edib. Nazir Baş nazir Benyamin Netanyahunu addım atmağa çağırıb.
O deyib ki, bu layihə təsdiqlənərsə, Abbas həbs edilməli və Fələstin rəhbərlərinin hədəfli şəkildə zərərsizləşdirilməsi gündəmə gəlməlidir.
O iddia edib ki, layihənin qəbul edilməsi “Fələstin Dövlətinin qurulması istiqamətində təhlükəli bir dönüş nöqtəsi” olacaq.
ABŞ administrasiyasının BMT Təhlükəsizlik Şurasına təqdim etdiyi layihədə Qəzzada 2 il müddətinə fəaliyyət göstərəcək və İsrail ordusunun geri çəkildiyi bölgələrdə təhlükəsizliyi təmin edəcək Beynəlxalq Sabitlik Qüvvəsi (ISF) nəzərdə tutulur. Layihə çərçivəsində ISF-in səlahiyyətləri 2027-ci ilə qədər uzadıla bilər. ABŞ və tərəfdaş ölkələrə Qəzzanı idarə etmək və təhlükəsizliyi təmin etmək mandatı verilir.
Layihənin mətni ayrıca Fələstinlilərin “öz müqəddəratını təyin etməsi və dövlət qurması üçün şərait yaradılmasını” da ehtiva edir. Bu, İsrailin bəzi siyasi dairələrində Fələstin dövlətçiliyinə gedən yol kimi qiymətləndirilir və buna görə narahatlıq yaradır.
Axios-un məlumatına əsasən, ABŞ Prezidenti Donald Tramp administrasiyası tərəfindən hazırlanmış layihə bu axşam BMT Təhlükəsizlik Şurasında səsverməyə çıxarılacaq. ABŞ-nin planına görə, ilk beynəlxalq hərbi birləşmələrin yanvar ayına qədər Qəzzaya göndərilməsi nəzərdə tutulur.
ISF-in əsas vəzifələri arasında sərhəd təhlükəsizliyini təmin etmək, mülki əhalini və humanitar dəhlizləri qorumaq və yeni Fələstin polis qüvvəsinin yaradılmasına yardım etmək yer alır.
Qeyd edək ki, layihə İsrail ictimaiyyətində xüsusilə sağçılar arasında ciddi mübahisələrə yol açıb və hökumət daxilində fikir ayrılıqlarını daha da dərinləşdirib.