BAKI, AzerVoice

Ukrayna Baş Qərargahı Rusiyanın 2022-ci ilin fevralında başladığı genişmiqyaslı işğalından bu yana cəbhədə təxminən 1 milyon canlı qüvvə itkisi verdiyini açıqlayıb.

AzerVoice xəbər verir ki,, Rəsmi Kiyev bu rəqəmlərin təkcə ölənləri, yoxsa yaralı, itkin düşən və əsir götürülənləri də əhatə edib-etmədiyini dəqiq açıqlamasa da, ehtimal olunur ki, qeyd olunan rəqəmlər ümumi itkiləri əhatə edir.

Volodimir Zelenski 2024-cü ilin fevralında açıqlamasında bildirib ki, indiyə qədər 46 mindən çox ukraynalı əsgər həlak olub, təxminən 380 min nəfər yaralanıb, on minlərlə əsgər isə ya itkin düşüb, ya da Rusiya tərəfindən əsir götürülüb.

Rusiyanın Müdafiə nazir müavini Anna Tsivilyova isə 2024-cü ilin noyabrında verdiyi açıqlamada, itkin düşmüş əsgərlərin yaxınlarından 48 minə yaxın DNT nümunəsi toplandığını bildirib.

Hazırda Rusiya ordusu gündə təxminən 1000 nəfər itki verir. Bu səbəblə Moskva xarici döyüşçüləri də ordusuna cəlb etməyə çalışır.

Kiyevin verdiyi məlumata görə, ən azı 160 Çin vətəndaşı da Rusiya ordusunda xidmət edir. Çin hakimiyyəti bu şəxslərin rəsmi deyil, könüllü döyüşçülər olduğunu iddia edir.

Ukrayna hərbi kəşfiyyatının məlumatına görə, Rusiya ordusu yay aylarında yeni genişmiqyaslı hücuma hazırlaşır. Cəbhə xətti 1000 km-dən artıq bir ərazini əhatə edir və döyüşlər xüsusilə Donetsk bölgəsində, Pokrovsk və Kostyantynivka ətrafında intensivləşib.

Rusiya Prezidenti Vladimir Putin son çıxışında Ukrayna ilə sərhəddə “təhlükəsizlik bufer zonası” yaradılması qərarını elan edib. O, bu tapşırığın hazırda Rusiya Silahlı Qüvvələri tərəfindən yerinə yetirildiyini bildirib.

Putin bu açıqlamanı Kursk, Belqorod və Bryansk bölgələrinin rəhbərlərinin təhlükəsizlik tələblərindən sonra səsləndirib. Rusiya Təhlükəsizlik Şurasının sədr müavini Dmitri Medvedev isə daha da irəli gedərək, Ukraynanın demək olar ki, bütün ərazisinin “bufer zona” kimi Rusiyanın nəzarətində olması çağırışı ilə çıxış edib.