BAKI, AzerVoice
Son yarım saat ərzində Rusiyanın Kamçatka yarımadasında 5,2; 5,0; 5,4 və 6,0 bal gücündə dörd zəlzələ baş verib.
AzerVoice xəbər verir ki, bu barədə Rusiya Elmlər Akademiyasının Geofizika Xidmətinin Kamçatka filialı "Telegram" kanalında məlumat yayıb.
Məlumata görə, 5,2 bal gücündəki zəlzələ Petropavlovsk-Kamçatski şəhərindən 248 km, 5,0 bal gücündəki 204 km, 5,4 bal gücündəki 297 km, 6,0 bal gücündəki isə 402 km məsafədə baş verib. Zəlzələlərin dərinliyi müvafiq olaraq 38,7 km, 13,7 km, 88 km və 77,1 km təşkil edib.
Hazırda zəlzələlərin yer səthində hiss olunması ilə bağlı məlumat yoxdur.
Qeyd edək ki, iyulun 30-da səhər saatlarında Kamçatka sahillərində 1952-ci ildən bəri bölgədə qeydə alınan ən güclü zəlzələ baş verib. Rəsmi məlumatlara əsasən, həmin zəlzələnin maqnitudası 8,8 olub. Rusiya Elmlər Akademiyasının Kamçatka filialı isə göstəricinin 8,7 olduğunu açıqlayıb. Hadisədən sonra bölgədə 5 baldan yuxarı bir neçə afterşok qeydə alınıb.
Regionun Səhiyyə Nazirliyi bir nəfərin xəsarət aldığını açıqlayıb. Kamçatkada fövqəladə hazırlıq rejimi elan olunub, Saxalin vilayətinin Şimali Kuril rayonunda isə fövqəladə vəziyyət rejimi tətbiq edilib. Zəlzələ Sakit okeanda sunami təhlükəsi yaradıb. Yaponiya, ABŞ və Filippin hakimiyyəti əhaliyə xəbərdarlıq edib.
