BAKI, AzerVoice
Çin 2025-ci ilin iyun ayında son üç il ərzində ilk dəfə olaraq ABŞ-dan xam neft idxalını sıfıra endirib.
AzerVoice xəbər verir ki, statistikaya əsasən, may ayında ABŞ-dan Çinə ixrac olunan neftin dəyəri 72,8 milyon dollar təşkil edib ki, bu da əvvəlki ayla müqayisədə 4,2 dəfə azalma deməkdir.
Yanvarda bu rəqəm 461,5 milyon dollar, dekabrda isə 513 milyon dollar olub. İlin ilk yarısında ABŞ-dan Çinə ümumi neft ixracı 1,33 milyard dollara bərabər olub ki, bu da ötən illə müqayisədə 2,1 dəfə azalma deməkdir.
Eyni zamanda Çin digər tədarükçülərdən neft alışını əhəmiyyətli dərəcədə artırıb. İyun ayında Səudiyyə Ərəbistanından neft idxalı 36 faiz artaraq 3,87 milyard dollara, Malayziyadan idxal 52 faiz artımla 3,4 milyard dollara, BƏƏ-dən idxal 18 faiz artaraq 1,38 milyard dollara, Küveytdən isə 15 faiz artımla 732 milyon dollara çatıb.
Rusiya isə iyun ayında 3,95 milyard dollarlıq tədarüklə Çinin ən böyük neft ixracatçısı mövqeyində qalmağı bacarıb.
Analitiklərin fikrincə, Çin ABŞ-dan idxalı daha sərfəli şərtlərlə neft təqdim edən ənənəvi partnyorları – Rusiya və Səudiyyə Ərəbistanı ilə əvəzləyir.
Vaşinqtonun Rusiya ilə ticarət əlaqələri olan tərəfdaşlara əlavə tarif tətbiq edəcəyi ilə bağlı verdiyi təhdidlər fonunda Çin Xarici İşlər Nazirliyi bildirib ki, ölkənin enerji təhlükəsizliyi sahəsində prioritetləri öz milli maraqlarına əsaslanır.
Çin lideri Si Cinpin də çıxışlarında dəfələrlə vurğulayıb ki, enerji təhlükəsizliyi Çin üçün strateji əhəmiyyət daşıyır və bu sahədə siyasət ölkənin suveren maraqlarına əsaslanmalıdır.
