BAKI, AzerVoice
Rusiyanın şərqində yerləşən Kamçatka yarımadasında bu gün yerli vaxtla səhər saatlarında 8.8 bal gücündə güclü zəlzələ baş verib.
AzerVoice xəbər verir ki, bu barədə Rusiya Elmlər Akademiyası Geofizika Xidmətinin Kamçatka şöbəsi tərəfindən məlumat verilib. Məlumata görə, zəlzələ təxminən 20 kilometr dərinlikdə qeydə alınıb və 1952-ci ildən bəri bölgədə baş verən ən güclü zəlzələ hesab olunur.
Zəlzələ sonrası sunami təhlükəsi səbəbilə ABŞ və Yaponiyada fövqəladə vəziyyət elan olunub. Sakit okean sahilində yerləşən bölgələrdə təxliyə tədbirlərinə başlanılıb.
Rusiya Fövqəladə Hallar Nazirliyi Kamçatkada baş vermiş sunami nəticəsində Kuril adalarına daxil olan Severo-Kurilsk şəhərinin bir hissəsinin su altında qaldığını açıqlayıb.Sunami dalğaları Paramuşir və Şumşu adalarına da çatıb, “Alaid” adlı balıqçılıq müəssisəsi də qismən su altında qalıb. Rəsmilər insan itkisi və ciddi xəsarət qeydə alınmadığını bildiriblər.
Rusiya Elmlər Akademiyası təkrar zəlzələ dalğalarının bir ay ərzində 7.5 bal gücünə çata biləcəyi ilə bağlı proqnoz verib.
Yaponiyanın Meteorologiya Agentliyi isə Kamçatkada baş verən zəlzələdən sonra ölkənin Sakit okean sahillərində – şimaldakı Hokkaydo adasından cənub-şərqdəki Vakayama prefekturasına qədər olan ərazidə – 3 metrə qədər hündürlükdə sunami təhlükəsi ilə bağlı xəbərdarlıq yayıb. NHK dövlət televiziyasının məlumatına görə, Miyaqi prefekturasının İşinomaki limanında 50 sm, Tokaçi limanında 40 sm, Erimo şəhərində isə 30 sm hündürlüyündə dalğalar qeydə alınıb. Tohoku və Kanto bölgələrində də 20-40 sm aralığında dalğalar müşahidə olunub.
Yaponiya Meteorologiya Agentliyinin rəsmisi Kiyomoto Masaşi vətəndaşları sahil və çay yaxınlıqlarından uzaqlaşmağa, təhlükə tam keçənədək yüksək ərazilərə sığınmağa çağırıb. O həmçinin əlavə edib ki, sunami dalğaları uzun müddət ərzində təkrar-təkrar vurmaq təhlükəsi daşıyır və növbəti artçı təkanlar daha güclü ola bilər.
Hadisə bölgəsində axtarış-xilasetmə və zərərin qiymətləndirilməsi işləri davam etdirilir. Hazırda vəziyyətin nəzarət altında olduğu bildirilir.
