BAKI, AzerVoice

Yəməndən atılan raket İsrailin Ben Qurion hava limanının fəaliyyətini iflic edib.

AzerVoice xəbər verir ki, Yəməndəki husilərin İsrailə qarşı həyata keçirdiyi raket hücumu nəticəsində Ben Qurion Beynəlxalq Hava Limanında uçuşlar müvəqqəti olaraq dayandırılıb.

Hücumun ardından təhlükəsizlik tədbirləri gücləndirilib, sərnişinlər sığınacaqlara yönləndirilib.

İsrail mediası, xüsusilə Kanal 12 televiziyası, Tel-Əviv yaxınlığındakı hava limanında sirenlərin səslənməsi ilə yanaşı, həm uçuşların, həm də enişlərin qısa müddətə dayandırıldığını bildirib.

Husilərin sözçüsü Yəhya Seri məsələ ilə bağlı açıqlamasında “Zülfikar” ballistik raketi ilə Lod (Ben Qurion) Hava Limanına qarşı əməliyyat həyata keçirildiyini bildirib. Hücumun Tel-Əviv və Hayfadakı əlavə hədəfləri də əhatə etdiyi qeyd olunub.

İsrail ordusu isə son 24 saat ərzində Yəməndən iki ballistik raketin qarşısının alındığını və protokola uyğun olaraq xəbərdarlıq sirenlərinin işə salındığını açıqlayıb.

Husilər həmçinin bəyan ediblər ki, İsrailin Qəzzaya davam edən hücumları fonunda Ben Qurion hava limanı və hava yolları təhlükəsiz deyil. Onlar beynəlxalq aviaşirkətləri İsrailə uçuşlardan çəkinməyə çağırıblar.

Qeyd edək ki, husilər daha əvvəl – mayın 4-də də Ben Qurion hava limanına ballistik raket atmışdılar. Həmin tarixdən sonra bir sıra beynəlxalq hava yolları İsrailə uçuşlarını dayandırıb.

Bununla yanaşı, husilər mayın 20-də Hayfa limanını mühasirəyə alacaqlarını elan ediblər. ABŞ isə mart ayından etibarən husilərə qarşı hava zərbələrinə başladığını açıqlamışdı. Oman XİN rəhbəri Bədr əl-Busaidi isə mayın 6-da ABŞ ilə husilər arasında Qırmızı dəniz və Bab əl-Məndəb boğazında atəşkəs razılaşmasının əldə olunduğunu bildirmişdi.