BAKI, AzerVoice
Çin Xarici İşlər Nazirliyi Avropa Komissiyasının rəhbəri Ursula von der Leyenin Pekinin Rusiya ilə əməkdaşlığını məhdudlaşdırmaq çağırışına sərt cavab verib.
AzerVoice xəbər verir ki, nazirliyin rəsmi nümayəndəsi Mao Nin bildirib ki, Çin ilə Rusiya arasındakı əməkdaşlıq normal xarakter daşıyır və üçüncü tərəflərin müdaxiləsini qəbul etmir.
“Çin ilə Rusiya arasında aparılan əməkdaşlıq sırf normal tərəfdaşlıqdır və üçüncü tərəflərin müdaxiləsinə məruz qalmamalıdır” – deyə Mao Nin qeyd edib.
Çinli diplomat vurğulayıb ki, Moskva və Pekin arasında qarşılıqlı əlaqələr heç bir üçüncü tərəfə qarşı yönəlməyib və regional sabitlik, iqtisadi tərəfdaşlıq çərçivəsində həyata keçirilir.
Xatırladaq ki, Ursula von der Leyen daha öncəki açıqlamasında Çin rəhbərliyini Rusiyaya dolayı yolla dəstək verməkdə ittiham etmiş və Pekindən Moskvaya göstərilən texnoloji və iqtisadi dəstəyi dayandırmağı tələb etmişdi.
O, Çini Rusiyanın hərbi iqtisadiyyatının inkişafına faktiki olaraq töhfə verməkdə günahlandırmışdı.
Pekin isə bu iddiaları rədd edərək, Çin-Rusiya münasibətlərinin beynəlxalq hüquqa və qarşılıqlı hörmət prinsiplərinə əsaslandığını bəyan edib.
