BAKI,
AzerVoice
Husilər Qırmızı dənizdə "Magic Seas" gəmisini batırıb– 3 pilotsuz
təyyarə və 5 ballistik raketlə hücum edilib.
AzerVoice xəbər verir ki, Yəməndəki
husilər İsraillə əlaqəsi olduğunu iddia etdikləri "Magic Seas" yük
gəmisini Qırmızı dənizdə hədəfə alaraq batırıblar.
Hücumun 3 pilotsuz təyyarə və 5 ballistik raketlə həyata
keçirildiyi bildirilib.
Husilərin hərbi sözçüsü Yəhya Seri hücumla bağlı verdiyi açıqlamada, gəminin Hudeyda sahillərində çoxsaylı xəbərdarlığa baxmayaraq dayanmadığını və buna görə hədəf alındığını bildirib. X sosial media platformasında yayımlanan videoda gəminin əvvəlcə dronlarla, daha sonra isə silahlı hücumla vurulduğu və sonda Qırmızı dənizdə tamamilə batdığı əks olunub.
Seri gəminin İsrail limanlarına getdiyi üçün hədəf alındığını deyib. O, ekipajın əvvəlcədən xəbərdarlıq edilərək gəmini tərk etməsinə şərait yaradıldığını da qeyd edib.
Qeyd edək ki, Birləşmiş Ərəb Əmirlikləri hücumdan sonra gəmi heyətinin xilas edildiyini açıqlayıb. Digər tərəfdən, ABŞ Dövlət Departamenti Magic Seas və digər yük gəmilərinə qarşı hücumları qətiyyətlə pisləyib. ABŞ bəyan edib ki, hücumlar dənizdə naviqasiya azadlığına və regional sabitliyə ciddi təhdiddir.
2023-cü ilin oktyabrından bəri husilər İsrailin Qəzzaya hücumlarına cavab olaraq, Yəmən sahillərində İsraillə əlaqəli gəmiçiliyi hədəfə alır. ABŞ isə regionda dəniz təhlükəsizliyini təmin etmək üçün tədbirlər görməyə davam edəcəyini bildirib.