BAKI, AzerVoice

Pakistan Hindistanla sülh danışıqlarına hazır olduğunu açıqlayıb.

AzerVoice xəbər verir ki, Pakistanın baş naziri Şahbaz Şərif Hindistanla münasibətləri normallaşdırmaq məqsədilə sülh danışıqlarına hazır olduqlarını bəyan edib.

O, bu fikirləri Pəncab əyalətində yerləşən Kamra hava bazasına səfəri zamanı səsləndirib.

Şərif Hindistanın Pahalqam bölgəsində baş vermiş və 26 nəfərin həyatını itirdiyi terror aktında Pakistanın əli olduğuna dair ittihamlarını rədd edib və İslamabad administrasiyasının gərginliyi azaltmaq üçün dialoqa açıq olduğunu vurğulayıb.

Pakistanın baş nazirinin müavini və xarici işlər naziri İshaq Dar da Senatda çıxışı zamanı ABŞ-ın vasitəçiliyi ilə əldə olunan atəşkəsin mayın 18-dək uzadıldığını açıqlayıb. O, prosesin sonda dialoqa yönələcəyini bildirib: “Bütün problemlərin müzakirə ediləcəyi və həllinə yönəlmiş ətraflı bir dialoq aparacağımızı dünyaya elan etdik”.

Xatırladaq ki, aprelin 22-də Hindistanın Cammu və Kəşmir bölgəsinin Pahalqam rayonunda törədilən terror aktından sonra Hindistan mayın 6-da Pakistan ərazisinə və Azad Kəşmir bölgəsinə raket zərbələri endirib. ABŞ-ın vasitəçiliyi ilə tərəflər mayın 10-da atəşkəs elan ediblər.