BAKI, AzerVoice, Fərid Mikayılov

Barselona Çempionlar Liqasının Nyukaslla qarşılaşmasında gənc ulduz Lamin Yamalın xidmətindən məhrum olacaq.

AzerVoice xəbər verir ki, baş məşqçi Hansi Flik futbolçunun durumuna görə İspaniya Futbol Federasiyasını kəskin tənqid edib.

Bununla belə, komanda üçün sevindirici xəbər – Frenki de Yonq zədəsini sağaldaraq heyətə qayıdıb.

Klubun açıqladığı siyahıda ən diqqətçəkən çatışmazlıq Yamalın yoxluğu olub. Gənc futbolçu İspaniya millisində çıxış edərkən qasıq sümüyündə zədə alıb. İspaniya mətbuatının yazdığına görə, o, ağrını azaltmaq üçün onurğa nahiyəsinə iynə də vurulub və sentyabrın sonuna qədər yaşıl meydanlardan kənarda qalacağı gözlənilir. Barselona Yamalın oktyabrın 1-də PSJ ilə oynanılacaq oyuna yetişəcəyinə ümid edir.

Baş məşqçi Flik Yamalın ağrılara baxmayaraq millidə uzun müddət oynadığını deyərək federasiyanı məsuliyyətsizlikdə günahlandırıb.

“Yamal milli komandaya ağrılarla getdi, məşq edə bilmədi. Onu oynatmaq üçün ağrıkəsici verdilər. Bu, futbolçunu qorumamaqdır” – deyə o bildirib.

Digər tərəfdən, Frenki de Yonq Niderland millisində aldığı zədədən sonra komanda ilə məşqlərə qoşulub. Onun Nyukasla qarşı ilk dəqiqələrdən oynamasa da, müəyyən qədər şans qazanacağı gözlənilir.

Məsələ ilə bağlı klub idman direktoru Dekonun RFEF-in texniki direktoru Aytor Karanka ilə görüşəcəyi, oyunçuların sağlamlıq vəziyyətinə dair kommunikasiya protokollarının aydınlaşdırılacağı qeyd olunub.