BAKI, AzerVoice, Nailə Babazadə

İran məhkəmə hakimiyyətinin məlumatına görə, ölkədə İsrail kəşfiyyatı lehinə casusluqda ittiham edilən Babək Şahbazi edam olunub.

AzerVoice xəbər verir ki, məhkəmənin rəsmi saytı “Mizan Online” bu gün açıqlama yayaraq bildirib ki, “Şahbazi barəsində çıxarılan edam hökmü Ali Məhkəmə tərəfindən təsdiqləndikdən sonra bu səhər asılmaqla icra edilib”.

İran mediasının məlumatına görə, Şahbazi ölkədəki server otaqları və hərbi-təhlükəsizlik obyektləri ilə bağlı məlumat toplamaq üçün soyutma sistemləri quraşdırıcısı kimi fəaliyyətindən istifadə edib.

O, daha əvvəl İsrail lehinə casusluqda təqsirli bilinərək edam olunan İsmayıl Fəkri ilə əməkdaşlıqda ittiham olunurdu. Fəkri bu ilin iyun ayında eyni ittihamla edam edilmişdi və 2022-ci ildən etibarən İsraillə əlaqəli fəaliyyət göstərdiyi iddia olunurdu.

Beynəlxalq mediada yayılan məlumatlara görə, İranda bu il İsrail üçün casusluqda ittiham edilən iranlıların edamı kəskin artıb. Son aylarda ən azı 9 nəfər bu ittihamlarla edam edilib.