BAKI, AzerVoice
ABŞ prezidenti Donald Tramp İsrailin Qəzzaya başlatdığı genişmiqyaslı quru əməliyyatını “özünümüdafiə” adlandırıb.
AzerVoice xəbər verir ki, o, əməliyyatın minlərlə hədəfi əhatə etdiyini bildirib və HƏMAS-ı girovlardan insan qalxanı kimi istifadə etməməyə sərt şəkildə xəbərdar edib.
Tramp çıxışında deyib: “Əgər onlar belə etsələr, böyük bir bəlaya düşəcəklər. Yenə də böyük bəlaya düşəcəklər”. O, HƏMAS-ın girovları “mağaralardan və dərin tunellərdən” hərəkət etdirdiyini iddia edərək bu metodları “əsrlərdir görünməmiş vəhşilik” adlandırıb.
Tramp həmçinin BMT-ni və beynəlxalq qurumları sərt tənqid edib. BMT-nin İsraili “soyqırımı” törətməkdə ittiham edən son hesabatını rədd edən Tramp, “Onlar buna səs verdilər… Görəcəyik nə olacaq” deyib, lakin ABŞ-ın konkret addımlarını açıqlamayıb.
Trampın bu açıqlamaları İsrailin Qəzzada başlatdığı böyükmiqyaslı hücum fonunda gəlib. İsrail ordusunun nümayəndəsi çərşənbə axşamı bildirib ki, ordu “əsas əməliyyata” start verib və qüvvələr artıq Qəzzanın mərkəzinə doğru irəliləyir. Onun sözlərinə görə, şəhərdə təqribən 2000–3000 HƏMAS döyüşçüsü var.
Rəsmi Təl-Əviv son bir ay ərzində Qəzza sakinlərinə şəhəri tərk etmək çağırışı etsə də, humanitar böhran və yüksək xərclər səbəbilə əksəriyyətin evlərini tərk edə bilmədiyi vurğulanır.
BMT-nin məlumatına görə, indiyədək 300 mindən çox insan Qəzzanın cənubuna köçsə də, şəhərdə hələ də 700 minə yaxın mülki şəxs qalır.