BAKI, AzerVoice, Nailə Babazadə

Tramp, Vaşinqtonun Demokrat meri Müriel Bouserin ABŞ İmmiqrasiya və Gömrük Nəzarəti Xidməti (ICE) ilə əməkdaşlıq etməyəcəyini açıqlamasından sonra, lazım gələrsə, fövqəladə vəziyyət elan edəcəyini və federal idarəetməyə keçəcəyini bildirib.

AzerVoice xəbər verir ki, ABŞ Prezidenti Donald Tramp, sosial media platforması Truth Social hesabında Vaşinqtondakı cinayət səviyyəsi və Bouserin açıqlamaları ilə bağlı paylaşım edib.

Federal hökumətin müdaxiləsi nəticəsində Vaşinqtonun bir neçə həftə ərzində ABŞ-ın, hətta dünyanın ən təhlükəli şəhərlərindən biri olmaqdan çıxaraq ən təhlükəsiz şəhərlərdən birinə çevrildiyini iddia edən Tramp, şəhərin "demək olar ki, cinayətsiz bir yer"ə çevrildiyini bildirib.

Tramp, şəhərdəki restoranların, mağazaların və bizneslərin dolu olduğunu qeyd edərək, Demokrat mer Bouserin ABŞ Miqrasiya və Gömrük Nəzarəti Xidməti (ICE) ilə əməkdaşlıq etməyəcəyini açıqladığını vurğulayıb.

Bouserin bu mövqeyinə cavab olaraq Tramp “Əgər buna icazə versəm, cinayətkarlıq yenidən baş qaldıracaq. Mən buna yol verməyəcəyəm. Lazım gələrsə, fövqəladə vəziyyət elan edəcəyəm və federal idarəetməni tətbiq edəcəyəm.” - deyə qeyd edib.