BAKI, AzerVoice, Səməd Əyyubov
ABŞ dövlət katibi Marko Rubio İsrailə səfər edib.
AzerVoice xəbər verir ki, səfər çərçivəsində o, ölkəsinin Təl-Əvivə dəstəyini bir daha təsdiqləyib. Bu bəyanat, İsrailin Qətərdə HƏMAS liderlərinə qarşı həyata keçirdiyi zərbələrin ABŞ prezidenti Donald Tramp da daxil olmaqla beynəlxalq və regional dairələrdə sərt tənqidlər doğurmasına baxmayaraq, səslənib.
Rubio Təl-Əvivə yola düşməzdən əvvəl jurnalistlərə açıqlamasında bildirib ki, Trampın İsraili açıq şəkildə tənqid etməsi ABŞ-ın İsrailə dəstəyini dəyişməyəcək.
“Baş verənlər artıq geridə qaldı. Aydındır ki, biz bu vəziyyətdən məmnun deyilik, prezident də razı deyil. Amma bu, israillilərlə münasibətlərimizin mahiyyətini dəyişməyəcək. Lakin müzakirə olunmalı məsələlər var, xüsusilə bunun atəşkəs cəhdlərinə necə təsir göstərəcəyi” - deyə, o qeyd edib.
Diplomat əlavə edib ki, münaqişənin sonrakı mərhələlərinə diqqət yönəltmək vacibdir: “Axırda hər şey başa çatanda, hələ də ‘HƏMAS’ adlanan bir qrup mövcud olacaq.”
Qeyd edək ki, Qətər uzun müddətdir ABŞ və Misirlə birlikdə Qəzza zolağında atəşkəsə nail olmaq üçün vasitəçi rolunu oynayır. Doha həmçinin HƏMAS ilə İsrail arasında dolayı danışıqlara ev sahibliyi edir. Lakin İsrailin son hava zərbələri Qətərin kəskin etirazına səbəb olub və atəşkəs səylərini daha da mürəkkəbləşdirib.
