BAKI, AzerVoice

ABŞ-ın 28 iri şəhərində torpaq çökməsi müşahidə olunur.

AzerVoice xəbər verir ki, aparılan yeni peyk radar araşdırması ABŞ-ın əhalisi ən sıx olan 28 şəhərində torpaq səthinin əhəmiyyətli dərəcədə çökdüyünü ortaya çıxarıb.

2015–2021-ci illəri əhatə edən araşdırmaya görə, tədqiq edilən şəhərlərin hamısında torpaq sahələrinin ən azı 20 faizi çökməyə məruz qalıb. Bu göstərici 28 şəhərdən 25-də 65 faizi ötüb. Təxminən 34 milyon insanın yaşadığı bu şəhərlərdə torpaq çökməsinin əsas səbəbləri kimi urbanizasiya, quraqlıq və dəniz səviyyəsinin qalxması göstərilir.

Virciniya Texnologiya Universitetinin geofiziki Leonard Ohenin rəhbərlik etdiyi tədqiqatda səthinin 98 faizindən çoxu çökmüş şəhərlər arasında Nyu-York, Hyuston, Çikaqo, Dallas, Kolumbus, Detroit, Fort Uort, Denver, İndianapolis və Şarlotta da yer alır.

Araşdırmaya əsasən, Hyuston ən çox təsirlənən şəhərdir. Şəhərin 40 faizindən çoxunda torpaq ildə 5 mm-dən çox çökür, 12 faizində isə bu göstərici 10 mm-i ötür. Bu çöküşlərin əsas səbəbi kimi qrunt sularının həddən artıq istifadəsi və enerji sektorunda hasilat fəaliyyəti göstərilir.

Tədqiqatda 29 mindən çox binanın yüksək riskli ərazilərdə yerləşdiyi qeyd olunub. Mütəxəssislər xəbərdarlıq edirlər ki, torpaq səviyyəsindəki enmələr çox vaxt səssiz gedir və infrastruktur yalnız kritik mərhələdə ciddi ziyan görür.

Geofizik Manoochehr Shirzaei bildirib ki, “Bu cür risklər sürətlə böyüyən şəhərlərdə daha yüksəkdir və vaxtında tədbir görülmədikdə nəticələr ciddi ola bilər.”

Qeyd edək ki, mütəxəssislər torpaq çökməsinin qarşısını almaq üçün hər şəhərə uyğun fərqli tədbirlərin görülməsini tövsiyə edirlər. Sahil şəhərlərində duzlu suya qarşı mübarizə və fırtına qoruma sistemləri, Yeni Orleanda isə torpaq səviyyəsinin qaldırılması və drenaj sistemlərinin təkmilləşdirilməsi təklif olunur.