BAKI, AzerVoice

ABŞ və Böyük Britaniya arasında yeni ticarət sazişinin elan ediləcəyi gözlənilir.

AzerVoice xəbər verir ki, bu barədə həm ABŞ Prezidenti Donald Tramp, həm də Britaniya hökuməti açıqlama verib.

Tramp, "böyük və yüksək hörmət edilən" bir ölkə ilə ticarət razılaşmasının tezliklə açıqlanacağını bildirib. Cümə axşamı səhər saatlarında Britaniya hökuməti həmin ölkənin Böyük Britaniya olduğunu təsdiqləyib və gün ərzində rəsmi bəyanat veriləcəyini açıqlayıb.

“Baş nazir hər zaman Böyük Britaniyanın milli maraqları naminə işçilər, biznes və ailələr üçün qərarlar verir. ABŞ bizim həm iqtisadi, həm də təhlükəsizlik baxımından əvəzsiz müttəfiqimizdir. Saziş üzrə danışıqlar sürətlə davam edib və gün ərzində əlavə məlumat veriləcək” - deyə Böyük Britaniyanın Baş nazirinin ofisindən bildirilib.

Razılaşmanın açıqlanması ilə Böyük Britaniya, ABŞ-la “Azadlıq Günü” (Liberation Day) adlandırılan dövrdən sonra ticarət sazişi imzalayan ilk ölkə olacaq. Mütəxəssislər danışıqların sürətlə aparıldığını, lakin ilkin mərhələdə sazişin əsasən avtomobil və polad sənayesini əhatə edəcəyini bildirirlər.