BAKI, AzerVoice

Toyota gömrük tariflərinin təsiri ilə mənfəət proqnozunu azaldıb.

AzerVoice xəbər verir ki, dünyanın ən böyük avtomobil istehsalçısı olan Toyota, ABŞ-ın gömrük rüsumları və Yapon yeninin dəyər qazanması fonunda 2025–2026-cı maliyyə ili üçün mənfəət proqnozunu 21 faiz aşağı salıb.

Şirkət 2026-cı ilin martına qədər olan dövr üçün əməliyyat mənfəətinin 3,8 trilyon yen (təxminən 26 milyard ABŞ dolları) olacağını gözləyir. Bu göstərici əvvəlki maliyyə ilində qeydə alınan 4,8 trilyon yendən əhəmiyyətli dərəcədə az olsa da, LSEG analitiklərinin orta hesabla 4,75 trilyon yen proqnozuna yaxındır.

Toyota bildirib ki, ABŞ-a ixrac edilən avtomobillərə tətbiq olunan tariflər şirkətin gəlirinə mənfi təsir etməklə yanaşı, istehlakçı inamını da zəiflədə bilər. Mənfəət gözləntilərinin azalmasının əsas səbəbləri kimi isə Yapon yeninin güclənməsi, xammal qiymətlərinin artması və proteksionist ticarət siyasətləri göstərilir.

Şirkət, ABŞ-da istehsal imkanlarını genişləndirməyi planlaşdırsa da, bunun daha yüksək əmək və kapital xərcləri ilə müşayiət oluna biləcəyini qeyd edib.

Qeyd edək ki, Toyota-nın Çin bazarındakı satışları digər yapon markalarına nisbətən daha az azalsa da, yerli istehsalçıların artan rəqabəti səbəbindən şirkət bazar payını qorumaqda çətinlik çəkir.