BAKI, AzerVoice
Macarıstanın baş naziri Viktor Orban, Almaniyanın Federal Konstitusiyanı Mühafizə İdarəsinin "Almaniya üçün Alternativ" (AfD) partiyasını sağ radikal təşkilat kimi tanıması fonunda partiyanın həmsədri Alis Vaydelə açıq dəstəyini ifadə edib.
AzerVoice xəbər verir ki, o bu barədə X sosial şəbəkəsində etdiyi paylaşımda deyib.
“Almaniyada nə baş verir, axı? Siz bizə güvənə bilərsiniz” - deyə, Orban Vaydelin X hesabını qeyd edərək paylaşımında bildirib.
Qeyd edək ki, ötən gün Almaniya Federal Konstitusiyanı Mühafizə İdarəsi AfD partiyasını sağ radikal təşkilat kimi tanıdığını açıqlayıb. Qurum bu qərarın partiyanın ideologiyasının demokratik azadlıqlarla uyğun gəlmədiyi üçün verildiyini bildirib. Bu status hüquq-mühafizə orqanlarına partiya üzvlərinə qarşı geniş nəzarət imkanları yaradır, o cümlədən telefonların dinlənilməsi və digər gizli əməliyyatlar üçün hüquqi əsas verir.
Hazırda partiyanın fəaliyyəti tam qadağan olunmayıb. AfD-nin qadağan olunması yalnız Federal Konstitusiya Məhkəməsinin qərarı ilə mümkündür. Əgər bu baş verərsə, AfD Almaniya tarixində qadağan edilən üçüncü siyasi partiya olacaq. Daha əvvəl 1952-ci ildə keçmiş nasistləri birləşdirən Sosialist İmperiya Partiyası və 1956-cı ildə Almaniya Kommunist Partiyası qadağan edilmişdi.
Xatırladaq ki, fevralın 23-də keçirilmiş növbədənkənar Bundestaq seçkilərində AfD öz tarixində ilk dəfə olaraq ikinci yeri tutmuşdu.
