BAKI, AzerVoice
Böyük Britaniya Qəzza zolağına humanitar yardımın çatdırılması və tibbi yardıma ehtiyacı olan uşaqların təxliyəsi məqsədilə beynəlxalq proqramlarda iştirak etməyi planlaşdırır.
AzerVoice xəbər verir ki, bu barədə Böyük Britaniyanın Baş naziri Kir Starmer Fransa Prezidenti Emmanuel Makron və Almaniya Kansleri Fridrix Mers ilə telefon danışığı zamanı bildirib.
“Üç lider Qəzzadakı vəziyyəti müzakirə edərək, dərhal atəşkəsin əldə olunmasının, İsrailin humanitar yardıma qoyduğu bütün məhdudiyyətlərin aradan qaldırılmasının və Qəzza sakinlərinə təcili ərzaq çatdırılmasının vacibliyini qeyd ediblər” - deyə, Baş nazirin ofisinin yaydığı bəyanatda bildirilib.
Bildirilib ki, Böyük Britaniya İordaniya kimi tərəfdaşlarla əməkdaşlıq çərçivəsində humanitar yardımların hava yolu ilə Qəzzaya çatdırılması və tibbi yardıma ehtiyacı olan uşaqların təxliyəsi planını irəli sürməyi nəzərdə tutur. Planın detalları açıqlanmayıb.
Qeyd edək ki, İsrailin 2023-cü il oktyabrın 7-dən bəri davam edən hücumları, intensiv bombardmanlar və blokada nəticəsində Qəzzada ağır humanitar fəlakət yaşanır. Beynəlxalq ictimaiyyətin və BMT-nin atəşkəs çağırışlarına baxmayaraq, vəziyyət pisləşməkdədir.