BAKI, AzerVoice
Türkiyə daha iki beynəlxalq axtarışda olan cinayətkarı ölkəyə gətirib.
AzerVoice xəbər verir ki, Türkiyənin daxili işlər naziri Ali Yerlikaya “qırmızı bülleten”lə beynəlxalq səviyyədə axtarışda olan iki şəxsin – M.S. və H.A.-nın Gürcüstanda saxlanılaraq Türkiyəyə ekstradisiya edildiyini açıqlayıb.
Nazir Yerlikaya sosial media hesabında paylaşdığı açıqlamada bildirib ki, Emniyet Genel Müdürlüğü Interpol-Europol Daire Başkanlığı tərəfindən koordinasiya olunan əməliyyatlar nəticəsində “silahla bir neçə nəfərlə birgə soyğunçuluq” cinayətinə görə axtarılan M.S. və “narkotik vasitələrin qanunsuz dövriyyəsi” ilə bağlı cinayət məsuliyyətinə cəlb edilən H.A. Gürcüstan ərazisində müəyyən edilərək Türkiyəyə təhvil verilib.
Qeyd edək ki, cari hökumət dövründə ümumilikdə 333 nəfərin – o cümlədən 16 terrorçu, 80 mütəşəkkil cinayətkar qrup üzvü, 68 narkotik taciri və digər cinayətlərdə ittiham olunan 169 şəxsin – xaricdə saxlanılaraq Türkiyəyə qaytarılması təmin edilib.
Ali Yerlikaya bu prosesdə əmək sərf edən Ədliyyə Nazirliyi və təhlükəsizlik orqanlarının əməkdaşlarına təşəkkür edərəl, “Türk polisindən heç kim qaça bilməz. Hansı ölkədə gizlənməsindən asılı olmayaraq, bütün cinayətkarlar ədalət qarşısına çıxarılacaq.”- deyə bildirib.
