BAKI,AzerVoice, Nailə Babazadə

Türkiyə Prezidenti Rəcəb Tayyib Ərdoğan, Efiopiyanın Baş naziri Abiy Əhməd Əlinin dəvəti ilə bu gün həmin ölkəyə rəsmi səfər edəcək. Səfər çərçivəsində ikitərəfli münasibətlərlə yanaşı, regional və qlobal məsələlərin müzakirəsi gözlənilir.

AzerVoice xəbər verir ki, Türkiyənin Afrika ilə qarşılıqlı hörmət və strateji tərəfdaşlıq prinsipləri əsasında həyata keçirdiyi siyasət çərçivəsində Prezident Ərdoğan Efiopiyanın paytaxtı Əddis-Əbəbəyə yola düşəcək.

Prezidentin yerli vaxtla saat 15:00 radələrində Əddis-Əbəbəyə çatacağı gözlənilir. Səfər proqramı Habeşistan–İtaliya müharibəsindən sonra Efiopiyanın müstəqillik və qələbə rəmzi hesab olunan Adva abidəsinin ziyarəti ilə başlayacaq. Ərdoğan abidə önünə əklil qoyduqdan sonra rəsmi görüşlərə keçəcək.

Abidə ziyarətindən sonra Prezident Ərdoğan Milli Sarayda Baş nazir Abiy Əhməd Əli tərəfindən rəsmi mərasimlə qarşılanacaq. Liderlər təkbətək görüşdə Türkiyə–Efiopiya münasibətlərini bütün istiqamətlər üzrə müzakirə edəcək, daha sonra nümayəndə heyətlərinin iştirakı ilə danışıqlar aparılacaq.

Danışıqlarda Afrika Buynuzu regionundakı proseslər, bütövlükdə Afrika qitəsindəki vəziyyət və qlobal inkişaflar ətrafında fikir mübadiləsi aparılacaq. Xüsusilə 2024-cü ilin dekabrında Ankarada imzalanmış və Efiopiya ilə Somali arasında gərginliyə son qoyan “Ankara Sazişi”nin icra vəziyyətinin də müzakirə olunacağı gözlənilir.

Görüşlərin yekununda liderlərin iştirakı ilə müxtəlif sahələrdə əməkdaşlıq sənədlərinin imzalanması planlaşdırılır. Daha sonra Prezident Ərdoğan və Baş nazir Abiy Əhməd Əli birgə mətbuat konfransı keçirəcəklər.

Prezident Ərdoğan səfər çərçivəsində onun şərəfinə Əddis-Əbəbə Beynəlxalq Konqres Mərkəzində təşkil olunacaq şam yeməyində iştirak etdikdən sonra günübirlik səfərini başa vuraraq ölkəsinə qayıdacaq.