BAKI,AzerVoice
"PYD-nin siyasi gigiyenik vasitə kimi istifadə olunub atılması ilk növbədə Türkiyənin xeyrinədir. Bu vəziyyət birmənalı olaraq Türkiyənin maraqlarına xidmət edir".
AzerVoice xəbər verir ki bunu Qaynarinfo-ya açıqlamasında siyasi şərhçi Rufiz Hafizoğlu Suriyada son zamanlar cərəyan edən proseslərdən hansı ölkənin daha qazanclı çıxdığına aydınlıq gətirərkən deyib. Müsahibimiz düşünür ki, burada Dəməşqin də marağı var:
"Həmin bölgələr kənd təsərrüfatı və neftlə zəngin olmaqla Suriya dövlətinin ayaqda qalması üçün ən önəmli yerlərdir".
Rufiz Hafizoğlu qeyd edir ki, kürd dili və Novruz bayramı məsələsi kürd xalqını PYD/YPG-nin inhisarından çıxarmaq üçün atılan addımdır:
"Onu bilmək lazımdır ki, kürd toplumu hər zaman Suriyanın tərkib hissəsi olub. Ölkədə əhalinin təxminən 30 faizi kürdlərdən ibarətdir. PYD/PKK-nın iddia etdiyinin əksinə olaraq, əslində kürdlər bölgədə daha dindar toplumdur. Amma baş verən hadisələr fonunda elə təəssürat yarandı ki, guya bütün kürdlər solmeyilli, marksist-kommunist təşkilatların üzvləridir. Əhməd Şaraanın kürd dili və Novruz bayramı ilə bağlı verdiyi qərar siyasi məsləhətləşmələrlə həyata keçirilən bir addım olub və nəticədə Novruz bayramı milli bayram elan olundu. Kürd dili faktorunun milli dil kimi qəbul olunması da önəmli addımdır. Bu, əslində kürd xalqını PYD/YPG-nin inhisarından çıxarmaq üçün atılan addım idi".
Həmsöhbətimiz deyir ki, ABŞ-ın PYD-yə dəstəyi dayandırması artıq onlara ehtiyacın olmamasından qaynaqlanır:
"ABŞ-ın PYD-yə silah dəstəyinin kəsilməsi daha öncədən hissə-hissə həyata keçirilirdi. Suriyada əvvəllər "parçala və hökm et" siyasətini görürdüksə, bu gün regionda fərqli mənzərədir. ABŞ və digər super güclər bilir ki, kiçik bölünmüş rejimləri idarə etmək o qədər də asan deyil. PKK da əslində rus beyninin məhsuludur. Amma zaman keçdikcə bu beyin məhsulu transformasiyalara uğrayaraq, don dəyişərək ABŞ-ın himayəsinə keçdi. Artıq isə ona ehtiyac yoxdur. Bəşər Əsəd rejiminin çökməsi bir çox siyasi problemli məsələlərin həllinə gətirib çıxarır. Siyasətdə heç bir şey təsadüfi baş vermir. Baş verənlər fonunda İsrail-Suriya arasında müəyyən məsələlərdə səthi olsa da, razılığa gəlmə məsələsi də var".
Ekspert bildirir ki, Suriya Rusiyanı tam olaraq izolyasiya edib:
"Rusiya hazırda Suriyada əvvəlki mövqeyində deyil. Amma bu o demək deyil ki, orada rus təsiri yoxdur. Rusiyanın hərbi bazaları qalmaqdadır. Onlar əvvəlki tək olmasa da, aktivliyi qoruyub saxlayırlar. Lakin heç bir halda Rusiyaya Suriyadakı əvvəlki legitimliyini qoruyub saxlamağa imkan verməyəcəklər. Nə Türkiyə, nə də ABŞ buna imkan verəcək. Əhməd əl-Şaraanın Moskva səfərinə gəldikdə, əsas mövzu iqtisadi məsələdir. Burada Suriyanın Rusiyaya olan milyardlarla borcunun silinməsi məsələsi var. Eyni zamanda Əsədin Dəməşqə verilməsi məsələsi də gündəmdədir".
Qeyd edək ki, son zamanlar Suriyada hadisələr sürətlə cərəyan edir. Suriyada PKK-nın qolu olan PYD artıq ABŞ dəstəyindən məhrum olur. Rəsmi Vaşinqton artıq onlara ehtiyaclarının olmadığını bəyan edib. Eyni zamanda Suriya ordusu kürd silahlı dəstələrinin nəzarəti altında olan bir sıra əraziləri yenidən Dəməşqin nəzarətinə qaytarıb. Suriya lideri Əhməd Şaraa isə kürd dili və Novruz bayramının keçirilməsinə "yaşıl işıq" yandırdı. Sabah Əhməd əl-Şaraa Rusiyaya səfər edəcək.
Rüfət Sultan