BAKI,AzerVoice
Bakı Beynəlxalq Dəniz Limanı ilə Türkmənbaşı Beynəlxalq Dəniz Limanı arasında logistika və tranzit əməkdaşlığının inkişafı istiqamətində müzakirələr aparılıb.
AzerVoice xəbər verir ki, Azərbaycan Respublikasına işgüzar səfər edən Türkmənbaşı Beynəlxalq Dəniz Limanının direktoru Parahat Jumayevin rəhbərlik etdiyi Türkmənistan nümayəndə heyəti Bakı Beynəlxalq Dəniz Limanı MMC-nin direktoru Eldar Salahov ilə görüş keçirib. Danışıqlarda Türkmənistanın Azərbaycandakı fövqəladə və səlahiyyətli səfiri Qurbanmämmet Elyasov da iştirak edib.
Görüşdə vurğulanıb ki, Azərbaycan və Türkmənistan arasında strateji tərəfdaşlıq ardıcıl şəkildə möhkəmlənir və xüsusilə Bakı (Ələt) və Türkmənbaşı beynəlxalq dəniz limanları arasında logistika əməkdaşlığına xüsusi önəm verilir. Bu əməkdaşlıq Xəzər dənizi üzərindən yükdaşımaların həcminin artırılmasına, Orta Dəhlizin inkişafına, eləcə də qarşılıqlı ticarət dövriyyəsinin genişləndirilməsinə xidmət edir.
Tərəflər son illərdə yükdaşımaların artırılması, sərhədkeçmə və gömrük prosedurlarının sadələşdirilməsi istiqamətində görülən işləri müsbət qiymətləndiriblər. Qeyd olunub ki, dəniz və dəmir yolu xidmətləri üzrə tariflərin azaldılması multimodal daşımaların və tranzit konteyner daşımalarının genişlənməsinə imkan yaradıb.
Müzakirələrdə Bakı (Ələt) və Türkmənbaşı limanlarının Xəzər dənizində Şərq–Qərb beynəlxalq nəqliyyat dəhlizinə xidmət edən əsas logistika mərkəzlərinə çevrilməsi hədəfi önə çəkilib. Bildirilib ki, bu marşrut üzrə neft, müxtəlif yüklər və dəmir yolu vaqonlarının daşınması həyata keçirilir. Modernləşdirmədən sonra Türkmənbaşı limanı iri nəqliyyat qovşağına çevrilib, Bakı limanı isə Ələt qəsəbəsində infrastrukturunu genişləndirərək yük və sərnişin daşımalarında rolunu artırıb.
Görüşdə, həmçinin Xəzər dənizi - Qara dəniz beynəlxalq tranzit və nəqliyyat dəhlizinin inkişafı, Türkmənbaşı, Bakı, Poti, Batumi və Konstansa limanları vasitəsilə yükdaşımaların artırılması perspektivləri müzakirə olunub. Avropa İttifaqı da daxil olmaqla bütün maraqlı tərəfdaşlarla əməkdaşlığın intensivləşdirilməsinin vacibliyi vurğulanıb.
