BAKI,AzerVoice, Orxan Qədirzadə
Qəzza zolağında son aylarda formalaşan silahlı dəstələrin fəaliyyətində müşahidə olunan taktiki dəyişikliklər “HƏMAS”ın daxili təhlükəsizlik mühitini daha da mürəkkəbləşdirib və hərəkata qarşı yeni təhlükəsizlik çağırışları yaradıb.
AzerVoice xəbər verir ki, əvvəlki mərhələdə əsasən nizamsız və spontan fəaliyyət göstərən silahlı qruplar son dövrdə daha planlı, məqsədli və hədəfyönlü əməliyyatlara keçiblər. Bu dəstələr arasında xüsusilə Şuqi Əbu Nusayra və Husam Əs-Tal qruplaşmalarının son bir ayda iki yüksək rütbəli “HƏMAS” təhlükəsizlik rəsmisinə qarşı həyata keçirdiyi sui-qəsdlər ciddi rezonans doğurub.
Məlumata görə, dekabrın 14-də Mərkəzi Qəzza bölgəsində daxili təhlükəsizlik əməkdaşı Əhməd Zəmzəmin, yanvarın 12-də isə Xan Yunisdə “HƏMAS” təşkilatının istintaq rəhbəri Mahmud Əs-Tal silahlı hücum nəticəsində öldürülüb. Sahə mənbələri bildirir ki, bu əməliyyatlar əvvəlcədən uzunmüddətli müşahidə və kəşfiyyat əsasında həyata keçirilib.
Təhlükəsizlik mənbələrinin məlumatına əsasən, bəzi silahlı dəstələrin İsrail kəşfiyyatı ilə birbaşa koordinasiya etdiyi, yeni silahlar, səsboğucu ilə təchiz olunmuş tapançalar və vizual qeydetmə avadanlıqları əldə etdiyi iddia olunur. Bu isə onların əvvəlki dövrlərlə müqayisədə daha təhlükəli və peşəkar fəaliyyət göstərdiyini göstərir.
Mövcud vəziyyət fonunda “HƏMAS” təhlükəsizlik strukturları yüksək hazırlıq rejiminə keçib. Hərəkat rəhbərliyinə yaxın mənbələr bildirir ki, son günlərdə bütün sahə komandirlərinə və təhlükəsizlik əməkdaşlarına xüsusi göstərişlər göndərilib. Göstərişlərdə marşrutların dəyişdirilməsi, şəxsi təhlükəsizliyin artırılması, rabitə vasitələrinin məhdudlaşdırılması və şübhəli hərəkətlərin dərhal bildirilməsi tələb olunur.
Eyni zamanda, “HƏMAS”ın təhlükəsizlik qüvvələrinin son günlərdə Qəzza şəhəri ətrafında bəzi silahlı dəstələrə qarşı əməliyyatlar keçirdiyi, bir neçə şəxsin saxlanıldığı və zərərsizləşdirildiyi bildirilir.
Analitiklərin fikrincə, Qəzzada silahlı dəstələrin taktiki transformasiyası təkcə daxili təhlükəsizlik problemi deyil, həm də bölgədə İsrail-Fələstin qarşıdurmasının yeni mərhələyə keçdiyinin göstəricisidir. Bu proses “HƏMAS” üçün həm əməliyyat, həm də sosial legitimlik baxımından ciddi risklər yaradır.