BAKI, AzerVoice, Nailə Babazadə

MHP sədri Devlet Bahçeli partiyasının TBMM-dəki qrup toplantısında çıxış edərək Suriyadakı son hadisələr və daxili təhlükəsizlik məsələləri ilə bağlı mühüm bəyanatlar verib. Bahçeli Dəməşq və Ankara arasındakı təhlükəsizlik əlaqəsinin strateji əhəmiyyətini vurğulayaraq Suriya xalqının birliyinin Türkiyə üçün vacib olduğunu bildirib.

AzerVoice xəbər verir ki, MHP lideri Suriyada baş verən son siyasi və hərbi dəyişikliklərin həm bölgə ölkələri, həm də Türkiyə üçün son dərəcə əhəmiyyətli olduğunu qeyd edib. "Dəməşqin təhlükəsizliyi Ankaranın təhlükəsizliyidir. Suriya xalqının səadəti, rifahı və birliyi Türk milləti ilə birdir və eynidir" deyən Bahçeli regiondakı sabitliyin birbaşa Türkiyənin milli maraqlarına təsir etdiyini vurğulayıb.

Çıxışında terrorla mübarizə mövzusuna da toxunan Bahçeli YPG-nin bir terror təşkilatı olduğunu və kürd xalqını təmsil etmək iddiasının tamamilə əsassız olduğunu bildirib. O qeyd edib ki, bu cür iddialar xəyal məhsuludur və Türkiyənin bu məsələdəki qətiyyətli mövqeyi dəyişməz olaraq qalır.