BAKI, AzerVoice, Nailə Babazadə

Türkiyənin ədliyyə naziri Yılmaz Tunç dövlət bayrağına qarşı törədilən hücumla bağlı aparılan istintaqın davam etdiyini və indiyədək 14 nəfərin saxlanıldığını açıqlayıb.

AzerVoicexəbər verir ki, Ədalət və İnkişaf (AK) Partiyasının Türkiyə Böyük Millət Məclisində (TBMM) keçirilən qrup toplantısında iştirak edən nazir Tunç toplantıdan öncə jurnalistlərə açıqlama verib. O bildirib ki, hazırda 105 nəfər barəsində saxlanılma qərarı, 50 nəfər barəsində isə axtarış (tutma) qərarı mövcuddur.

Nazirin sözlərinə görə, baş verən hadisələrlə bağlı Mardin və Nusaybin başda olmaqla müvafiq Cumhuriyyət Baş Prokurorluqları tərəfindən zəruri hüquqi araşdırmalar başlanılıb. “Dünənki hadisələrlə əlaqədar ümumilikdə 393 nəfər barəsində hüquqi tədbir görülüb, onlardan 35-i barəsində həbs qətimkan tədbiri seçilib”, – deyə Yılmaz Tunç qeyd edib.

Ədliyyə naziri əlavə edib ki, Suriya hökumət qüvvələri ilə SDQ/YPG terror təşkilatı üzvləri arasında baş verən toqquşmaları bəhanə edən qruplar tərəfindən Türkiyənin müxtəlif bölgələrində keçirilən aksiyalarla bağlı provokativ halların araşdırılması davam edir.

Tunç xüsusilə bayrağın endirilməsi hadisəsinə toxunaraq bildirib ki, bu faktla bağlı 14 nəfər saxlanılıb və həm saxlanılan şəxslərlə bağlı prosedurlar, həm də bayrağı endirən şəxsin müəyyən edilməsi istiqamətində araşdırmalar davam etdirilir.