BAKI, AzerVoice, Orxan Qədirzadə

Livan hökuməti İsrailin Sidon şəhəri yaxınlığında avtomobili hədəfə alan zərbəsi nəticəsində üç nəfərin həlak olduğunu bildirib.

AzerVoice-un məlumatına görə, Livanın dövlətə məxsus Milli Xəbər Agentliyi hücumun İsrailə məxsus pilotsuz uçuş aparatı tərəfindən həyata keçirildiyini və hadisənin Sidon şəhərindən təxminən 10 kilometr məsafədə baş verdiyini açıqlayıb. Livanın Səhiyyə Nazirliyi də ölənlərin sayının üç nəfər olduğunu təsdiqləyib.

İsrail ordusu isə yayımladığı bəyanatda Sidon bölgəsində Hizbullah üzvlərinin hədəfə alındığını bildirib.

Qeyd edək ki, 2024-cü ilin noyabrında İsrail ilə İranın dəstəklədiyi Hizbullah arasında əldə olunan atəşkəs razılaşmasına baxmayaraq, İsrail Livan ərazisinə mütəmadi olaraq zərbələr endirməyə davam edir. İsrail bu hücumları Hizbullahın yenidən silahlanması ilə əsaslandırır.

ABŞ-ın ciddi təzyiqləri və İsrailin hücumları genişləndirməsi ilə bağlı narahatlıqlar fonunda Livan Hizbullahın silahsızlaşdırılmasına razılıq verib. Livan ordusu ilin sonunadək Litani çayının cənubunda bu prosesi başa çatdırmağı planlaşdırır.

Son insident Livan və İsrail tərəflərinin atəşkəsə nəzarət komitəsi çərçivəsində ikinci dəfə bir araya gəlməsindən sonra baş verib. Komitəyə Livan, İsrail, ABŞ, Fransa və BMT-nin Livandakı Müvəqqəti Qüvvələri daxildir.

Livan prezidenti Cozef Aun bildirib ki, danışıqların məqsədi döyüş əməliyyatlarını dayandırmaq, İsrail qüvvələrinin bölgədən çıxarılması, saxlanılan şəxslərin qaytarılması və cənub sakinlərinin evlərinə dönməsinin təmin edilməsidir.

Bu arada İsrail cənubi Livanda strateji hesab etdiyi beş ərazidə hərbi mövcudluğunu saxlayır. Son atəşkəsdən bəri İsrailin hücumları nəticəsində Livanda 340-dan çox insan həlak olub.