BAKI,AzerVoice

Livan “Lübnan Qüvvələri” Partiyasının sədri Samir Caca çərşənbə axşamı bildirib ki, Hizbullah HƏMAS-ın Qəzza zolağında yaşadığı təcrübədən dərs çıxarmalı və silahını mümkün qədər tez bir zamanda dövlətə təhvil verməlidir.
Caca uzun illərdir ölkə daxilində Hizbullahın silahsızlaşdırılmasını tələb edən əsas fiqurlardan biridir və Qərb dairələri ilə sıx münasibətləri ilə tanınır. Bu səbəbdən onun açıqlamaları təkcə siyasi mövqe deyil, həm də mövcud məlumatlara əsaslanan xəbərdarlıq kimi qiymətləndirilir.

Ötən ay ABŞ-ın Suriya üzrə elçisi Tomas Barak xəbərdarlıq etmişdi ki, əgər Hizbullahın silahsızlaşdırılması həyata keçirilməsə, yeni ilin əvvəlində vəziyyət dəyişəcək. Bu bəyanat Livanda İsraillə yeni və daha dağıdıcı müharibə ehtimalına dair qorxular doğurub.

“Əminəm ki, Hizbullah baş verənlərdən dərs almalıdır. Bu, onun silahını dövlətə ən qısa zamanda təhvil verməsi üçün əlavə bir səbəbdir. Vaxt itirmək günahdır.”-deyə Caca qeyd edib.

Hazırda İsrail və HƏMAS arasında Misirdə dolayı danışıqlar davam edir. ABŞ prezidenti Donald Trampın ötən həftə açıqladığı plana əsasən, atəşkəsin dərhal elan edilməsi, Həmasın silahsızlaşdırılması və onun Qəzzə idarəçiliyində iştirakının qarşısının alınması nəzərdə tutulur. Bu plan iki illik dağıdıcı müharibədən sonra bölgədə yeni mərhələ açmağı hədəfləyir.

Cacanın fikrincə, Hizbullahın hazırkı davranışı onu siyasi prosesdən kənarda qoyur. O qeyd edib ki, partiya rəhbərliyi “silahı təhvil verməkdən imtina etməklə populizmə meyl etməkdir”

“Açığı, onların nə etdiyini başa düşmürəm. Dəstək müharibəsinin məqsədi də aydın deyildi... 7 oktyabrda nə etdiklərini, nəyə əsaslandıqlarını və hara çatdıqlarını anlamadım,” - deyə Caca bildirib.

O vurğulayıb ki, Hizbullahın başqa çıxış yolu yoxdur - silahını dövlətə verməlidir, çünki “artıq qərarı dövlət verib”.