BAKI, AzerVoice, Nailə Babazadə

İsrail ordusu, atəşkəsə baxmayaraq, Qəzza şəhəri və ətrafındakı Xan Yunus və Rəfah bölgələrinə hava hücumları həyata keçirib, yaşayış binalarını partladıb.

AzerVoice xəbər verir ki, yerli mənbələrin verdiyi məlumata görə, İsrail döyüş təyyarələri Qəzza şəhərinin şərqindəki Tubas məhəlləsinə hücumlar təşkil edib. Eyni vaxtda İsrail əsgərləri bölgədəki binaları havaya uçurub. Partlayış səsləri şəhərin bir çox hissəsindən eşidilib.

Görgü şahidlərinin məlumatına görə, Xan Yunusun şərqindəki Beni Suheyla qəsəbəsi və Rəfahın bəzi bölgələrinə də hava hücumları edilib və yaşayış binaları partladılıb. Bundan əlavə, bu ərazilərə İsrail ordusuna aid helikopterlərdən və yaxınlıqdakı hərbi vasitələrdən intensiv atəş açılıb.

Hücumlarda həlak olan və ya yaralananların olub-olmaması barədə hələlik məlumat verilmir.

Qeyd edək ki, İsrail ordusu 10 oktyabrda əldə olunan atəşkəs razılaşmasına əsasən, Qəzzanın təxminən 50 faizini əhatə edən “Sarı Xətt” bölgəsinə çəkilmişdi. Lakin işğal altında olan və Fələstinlilərin girişinin qadağan edildiyi bu ərazilərdə, həftalardır oxşar bombardman və dağıdıcı əməliyyatlar davam edir.

Qəzza hökumətinin Mətbuat İdarəsinin məlumatına görə, İsrail 10 oktyabrdan bəri atəşkəs razılaşmasını təxminən 500 dəfə pozaraq ən az 347 Fələstinlini qətlə yetirib.