BAKI, AzerVoice, Nailə Babazadə

Qəzza Zolağında iki ilə yaxın davam edən müharibə dövründə İsrail ordusunun “insani yardım” adı altında yaradılan paylama mərkəzlərində 2 min 614 fələstinlini öldürdüyü bildirilib.

AzerVoice xəbər verir ki, İsrail və ABŞ tərəfindən yönləndirilən Qəzza Humanitar Yardım Fondu (GHF) dünən fəaliyyətlərini dayandırdığını açıqladıqdan sonra, Qəzza Səhiyyə Nazirliyinin Baş direktoru Münir əl-Burş mövzu ilə bağlı bəyanat yayıb.

Burş bildirib ki, yardım bölgələri əslində “ölüm tələsi”nə çevrilib və bu çərçivədə 2 min 614 nəfər döyüş meydanında deyil, qida və su tapmağa çalışdıqları vaxt öldürülüb.

Onun sözlərinə görə, insanların yaşamaq ümidi ilə yardıma üz tutduğu məkanlarda mülki şəxslərə atəş açılıb, hətta cəsədlərin üzərindən tank və yük maşınları ilə keçilib.

Burş bu hadisələrin sadə insident deyil, Qəzzanın boşaldılması, fələstinlilərin Sinaya köçürülməsi və bölgənin insansızlaşdırılması kimi daha geniş işğal planlarının bir hissəsi olduğunu qeyd edib.

O, bütün bu planların uğursuzluğa düçar olduğunu və fələstinlilərin öz torpaqlarında qaldığını vurğulayıb.