BAKI, AzerVoice, Nailə Babazadə

İsrail hökuməti bəyan edib ki, çərşənbə günü Qəzza zolağının şimalında yerləşən “Zikim” sərhəd-keçid məntəqəsi humanitar yardım maşınlarının bölgəyə daxil olması üçün açılıb. Bu, iki il davam edən müharibənin ağır nəticələrindən əziyyət çəkən Qəzza sakinlərinə yardım məqsədi daşıyır.

AzerVoice xəbər verir ki, İsrail Müdafiə Nazirliyinə tabe olan Hökumət Fəaliyyətlərinin Koordinasiyası İdarəsi (COGAT) bildirib ki, bu yardımlar BMT və beynəlxalq təşkilatlar tərəfindən çatdırılacaq və bütün yük maşınları “dəqiq təhlükəsizlik yoxlamalarından” sonra buraxılacaq.

BMT-nin Humanitar Məsələlərin Koordinasiyası Ofisi (OCHA) bazar ertəsi açıqlamasında qeyd edib ki, atəşkəsin başlanmasından bir ay keçməsinə baxmayaraq, humanitar yardımların artırılması səyləri hələ də çoxsaylı maneələrlə üzləşir. Bunlara bürokratik prosedurlar, əsas humanitar tərəfdaşlara qoyulan məhdudiyyətlər, keçid məntəqələrinin və yolların azlığı, həmçinin davam edən təhlükəsizlik problemləri daxildir.

Qəzzanın hökumət informasiya ofisinin məlumatına görə, keçən həftənin çərşənbə axşamına qədər zolağa daxil olan yardım maşınlarının sayı nəzərdə tutulan həcmdən cəmi 28 faiz təşkil edib.