BAKI, AzerVoice, Nailə Babazadə
Fələstinin Birləşmiş Millətlər Təşkilatındakı (BMT) daimi nümayəndəsi Riyad Mənsur İsrailin Qəzza zolağındakı atəşkəs razılaşmasını dəfələrlə pozduğunu bildirərək, razılaşmanın “son dərəcə kövrək” vəziyyətdə olduğunu vurğulayıb.
AzerVoice xəbər verir ki, Fələstinin rəsmi WAFA agentliyinin xəbərinə görə, Mənsur İsrailin Qəzzədə fələstinlilərə qarşı 700 gündən artıq davam edən hücumları ilə bağlı BMT baş katibi Antonio Quterreşə, BMT Təhlükəsizlik Şurasının sədrinə və BMT Baş Assambleyasının sədri Annalena Baerbocka məktublar göndərib.
Mənsur məktubunda qeyd edib ki, Qəzza zolağında atəşkəs “işğalçı İsrail qüvvələrinin ciddi və təkrarlanan pozuntularına” məruz qalır. Onun sözlərinə görə, son üç həftə ərzində İsrail ordusu atəşkəsi yüzlərlə dəfə pozub, nəticədə aralarında qadın və uşaqların da olduğu 211 fələstinli həyatını itirib, infrastruktur isə geniş miqyasda dağıdılıb.
Fələstin nümayəndəsi beynəlxalq ictimaiyyəti “Fələstin xalqının əzablarını azaltmaq, bərpa və yenidənqurma prosesini asanlaşdırmaq və İsrailin Qəzzədən tamamilə çıxmasını sürətləndirmək” üçün atəşkəsin pozulmasını dərhal dayandırmağa və onun davamlı icrasını təmin etməyə çağırıb.
Mənsur bildirib ki, atəşkəs qalıcı və hərtərəfli olmalı, Şərqi Qüds də daxil olmaqla işğal altındakı bütün Fələstin ərazilərini əhatə etməlidir. O, həmçinin İsrailin beynəlxalq hüququ və BMT qərarlarını açıq şəkildə pozaraq qanunsuz yaşayış məntəqələrini genişləndirməyə davam etdiyini vurğulayıb.
İsrail ordusu Qəzzədə atəşkəsi tez-tez pozmaqda davam edir.
İsrailin 2023-cü ilin oktyabrında Qəzza zolağına başladığı və iki il davam edən hücumlar nəticəsində təxminən 69 min fələstinli həlak olub, 170 mindən çox insan yaralanıb. Qəzzanın infrastrukturunun 90 faizi tamamilə dağıdılıb.
Qəzzədə atəşkəs və əsir mübadiləsi razılaşması 9 oktyabrda Misirdə aparılan danışıqlar nəticəsində İsrail ilə Həmas arasında əldə olunmuş, 10 oktyabrda İsrail hökumətinin təsdiqi ilə qüvvəyə minmişdi.
Lakin İsrail 28 oktyabr axşamından 29 oktyabr səhərinədək Qəzzənin müxtəlif bölgələrinə güclü hücumlar həyata keçirərək, 46-sı uşaq olmaqla 104 fələstinlini öldürmüş, 253 nəfəri yaralamışdı.
İsrail ordusu daha sonra, 29 oktyabrda, atəşkəsin yerli vaxtla saat 10:00-da (Bakı vaxtı ilə 11:00) yenidən qüvvəyə mindiyini elan etmişdi.