BAKI, AzerVoice, Orxan Qədirzadə

Misirin xarici işlər naziri Bədr Əbdül-Əti bu gün (bazar günü) ABŞ-ın CBS News telekanalına verdiyi müsahibədə bildirib ki, Qəzzanın gələcəyi ilə bağlı yekun və hərtərəfli həll Fələstin dövlətinin yaradılması olacaq. O vurğulayıb ki, Fələstin məsələsi həll olunmadan regionda nə sülh, nə də sabitlik mümkündür.

AzerVoice-un məlumatına görə Əbdül-Əti qeyd edib ki, Misir ABŞ prezidenti Donald Trampın sülh planının birinci mərhələsinin həyata keçiriləcəyinə əmindir və ümid edir ki, bu mərhələ İsrail və Fələstin HƏMAS hərəkatı tərəfindən səmimi şəkildə yerinə yetiriləcək.

Misirli nazir əlavə edib: “Biz fələstinlilərlə, o cümlədən HƏMAS-la tam təmasdayıq. Hazırda İsrail üçün əsas məsələ girovların azad edilməsidir, eyni zamanda fələstinlilər də İsrail həbsxanalarında olan bəzi məhbusların azad olunmasını istəyirlər.”

Xəbərə görə, İsrail bazar günü girovların geri qaytarılmasına hazırlaşır, HƏMAS isə onların azad edilməsinə bazar ertəsi səhərindən başlamağa söz verib. Bu, ABŞ prezidenti Donald Tramp və Misir prezidenti Əbdülfəttah əs-Sisinin rəhbərliyi ilə Misirdə keçiriləcək beynəlxalq sammitdən əvvəl baş tutacaq. Sammit Fələstin bölgəsinin gələcəyinə həsr olunacaq.

Qeyd edək ki, bu hadisələr Cümə günü Qəzzada atəşkəs sazişinin qüvvəyə minməsindən sonra baş verir. Saziş Trampın 20 maddəlik sülh planına əsaslanır və məqsədi 7 oktyabr 2023-cü ildə HƏMAS-ın İsrailin cənubuna hücumundan sonra başlayan müharibəyə son qoymaqdır.