BAKI, AzerVoice, Nailə Babazadə

HƏMAS hərəkatından bir mənbə Frans Press agentliyinə açıqlamasında bildirib ki, Misirdə aparılan dolayı danışıqlar nəticəsində İsraillə əldə olunan razılaşmanın birinci mərhələsi Qəzza zolağında saxlanılan israilli girovların azad edilməsi ilə yanaşı, İsrail həbsxanalarında olan 2000-dən çox fələstinli məhbusun azad olunmasını nəzərdə tutur.

AzerVoice xəbər verir ki, mənbənin sözlərinə görə, azad ediləcək fələstinlilər arasında 250 nəfər ömürlük həbs cəzası alanlar, həmçinin 2023-cü ilin 7 oktyabrından sonra saxlanılan min 700 nəfər də yer alacaq. O, həmçinin qeyd edib ki, razılaşmanın birinci mərhələsi çərçivəsində İsrail ordusunun mərhələli şəkildə planlaşdırılmış çıxışı da həyata keçiriləcək.

Digər tərəfdən, İsrail hökumətinin sözçüsü “Reuters” agentliyinə bildirib ki, girovların azad edilməsinə şənbə günü başlanacağı gözlənilir. Bu açıqlama ABŞ Prezidenti Donald Trampın İsrail ilə HƏMAS arasında Qəzza üzrə razılaşmanın birinci mərhələsinin imzalandığını elan etməsindən sonra səsləndirilib.

Lakin İsrail tərəfi hələlik bütün 48 girovun - həm sağ, həm də həlak olanların - eyni anda azad ediləcəyini təsdiqləməyib.