BAKI, AzerVoice, Nailə Babazadə
Qəzza zolağında ağır şərait və saysız-hesabsız təhlükələr altında çalışan jurnalistlər, həyatlarını riskə ataraq, baş verənləri işıqlandırmağa və həqiqəti çatdırmağa davam edirlər. Onlar təkcə bombardman və partlayış təhlükəsi ilə üzləşmirlər, həm də elektrik enerjisinin tam kəsilməsi, günəş panellərinin İsrail tərəfindən hədəfə alınaraq məhv edilməsi, internetin uzun müddət kəsilməsi və digər maneələrlə qarşı-qarşıyadırlar.
Müharibə başlayandan bəri Qəzzada 254 jurnalist həlak olub, çox sayda media nümayəndəsi isə yaralanıb
AzerVoice xəbər verir ki, Jurnalistləri Müdafiə Komitəsinin (Committee to Protect Journalists) hesabatına əsasən, ötən il öldürülən jurnalistlərin təxminən 70 faizi Qəzzada peşə fəaliyyətini yerinə yetirərkən həyatını itirib.
Mətbuat təşkilatlarının hesabatlarına görə, Qəzzadakı müharibə müasir dövrdə jurnalistlər üçün ən qanlı münaqişə sayılır. Müqayisə üçün: İkinci Dünya Müharibəsi dövründə 69, Vyetnam müharibəsində 63, Koreya müharibəsində isə 17 jurnalist həlak olmuşdu. Ukrayna-Rusiya müharibəsində indiyədək 17 media nümayəndəsi həyatını itirib. Ancaq Qəzzada cəmi iki il ərzində 250-yə yaxın jurnalistin öldürülməsi bu rəqəmləri dəfələrlə üstələyir.
Qurumlar və insan haqları təşkilatları baş verənləri hərbi cinayət kimi qiymətləndirir və jurnalistlərin müdafiəsi üçün təcili beynəlxalq tədbirlərin görülməsinə çağırırlar. Yaralı jurnalistlərin müalicə üçün təcili olaraq Qəzza xaricinə çıxarılması tələb olunur.