BAKI,AzerVoice
İran İslam İnqilabı Keşikçiləri Korpusunun (SEPAH) “Qüds Qüvvələri”nin komandanı İsmayıl Qaani “HƏMAS” tərəfindən 2023-cü ildə həyata keçirilmiş “7 oktyabr əməliyyatı” ilə bağlı yeni detalları açıqlayıb. O bildirib ki, hərəkatın birinci sıra liderləri, o cümlədən İsmayıl Haniyyə, əməliyyatın dəqiq vaxtından xəbərsiz olublar.
Qaani bu açıqlamanı SEPAH-a məxsus “Nəsim” kanalına və dövlət televiziyasına verdiyi müsahibədə səsləndirib.
“7 oktyabr əməliyyatı başladığı anda mən Livana gedirdim. Öz-özümə düşünürdüm ki, bu mövzunu Həsən Nəsrullahla necə müzakirə edim, nəyi etməliyik və ya nəyi etməməliyik. Nə biz, nə Nəsrullah, nə də HƏMAS rəhbərliyi əməliyyatın konkret vaxtından əvvəlcədən xəbərdar deyildik. İsmayıl Haniyyə hava limanına gedərək İraqa uçmaq üzrə idi və əməliyyatın başladığını geri dönərkən öyrəndi. Nəsrullah həmin andan etibarən ‘Əl-Əqsa Tufanı’ndan sonrakı mərhələnin planlaşdırılmasına başladı.”
Bu açıqlama əməliyyatın pərdəarxasında qalan məqamlarla bağlı yeni suallar yaradıb.
İsmayıl Haniyyə “HƏMAS” Hərəkatının Siyasi Bürosunun rəhbəri və təşkilatın ən tanınmış siyasi liderlərindən biri idi. 2024-cü ilin iyul ayında o, Tehranda-İranın yeni prezidenti Məsud Pezeşkianın andiçmə mərasiminə qatıldığı zaman-Zəfəraniyyə məhəlləsindəki iqamətgahında baş verən partlayış nəticəsində qətlə yetirilib.
İsrail, digər liderlərə qarşı həyata keçirdiyi hücumlardan fərqli olaraq, bu sui-qəsdi rəsmi şəkildə nə təsdiqləyib, nə də inkar edib. Eyni zamanda Qaaninin adı da İsrailin hədəf siyahılarında çəkilməyib.
Qaaninin açıqlamaları “HƏMAS”ın Qəzza zolağından həyata keçirdiyi hücumun arxasında duran sirli proseslərə yenidən diqqət çəkib. Həmin hücum nəticəsində İsraildə yüzlərlə insan həlak olmuş, regionda misilsiz bir müharibə başlamışdı.
İsrail dəfələrlə İranı Qəzza və Livanda ona qarşı əməliyyatlar planlaşdırmaqda və maliyyələşdirməkdə ittiham edib, lakin Tehran bu iddiaları rədd edərək dəstəyinin sırf siyasi xarakter daşıdığını vurğulayıb.
Livan “Hizbullah”ının üzləşdiyi təzyiqlərə toxunan Qaani qeyd edib ki, bu təşkilat bütün təzyiqlərə və psixoloji müharibələrə baxmayaraq, “getdikcə daha da güclənir və möhkəmlənir.”
“Hizbullah bölgədə böyük bir gücdür və onun yüksəlişi sürətlənir. Bu qüvvəni nə sındırmaq, nə də zəiflətmək mümkündür. Müqavimət hər keçən gün daha güclü və dözümlü olur. Düşmənin bütün silahları və psixoloji təzyiqləri belə onun iradəsini qıra bilmədi. Müqavimət davam edəcək və heç vaxt yox olmayacaq. ‘Hizbullah’ hər zaman olduğu kimi, güclü və sabit qalacaq.” – deyə o müsahibəsində bildirib.
Müsahibə zamanı Qaani ilk dəfə olaraq özünə qarşı sui-qəsd cəhdinə dair yayılan xəbərlərə də münasibət bildirib və deyib.
“Bunların hamısı şayiədir... Biz elə davranırdıq ki, düşmən asanlıqla rabitəni izləyə bilməsin.”-deyə o qeyd edib.
2024-cü ilin oktyabr ayının ilk həftələrində Qaaninin adı media gündəmini bürümüşdü. O dövrdə onun Beyrutun cənub məhəllələrində İsrailin hava zərbələri nəticəsində həlak olub-olmaması və ya təhlükəsizlik səbəbindən gizlənməsi barədə ziddiyyətli xəbərlər yayılmışdı.
“Mən elə hərəkət edirdim ki, düşmən əlaqə kanallarımızı aşkar edə bilməsin. Bəzən onların məqsədi rabitə sistemimizi izləmək üçün belə şayiələr yaymaq idi.Rəhbər şəxslər tam məxfi şəraitdə fəaliyyət göstərir və onların rabitəsi qorunur.”-deyə Qaani qeyd edib.
Qaani bildirib ki, qüvvələr rəhbərlərin təhlükəsizliyini təmin etmək və onlara qarşı bütün cəhdlərə cavab vermək üçün əlavə tədbirlər görüblər.
Onun taleyi ilə bağlı fərziyyələr “Qüds Qüvvələri” komandanının oktyabr 2024-də Beyruta getdiyi, “Hizbullah”ın baş katibi Həsən Nəsrullahın öldürülməsindən sonra təşkilatın vəziyyətinə nəzarət etdiyi barədə xəbərlərlə əlaqədar yayılmışdı.
O zaman “Reuters” agentliyi İran rəsmilərinə istinadən yazmışdı ki, “Nəsrullahın ölümündən sonra Livanda olan Qaani ilə əlaqə kəsilib.” Lakin “Qüds Qüvvələri”nin sədr müavini İrəc Məsədi sonradan bəyan etmişdi ki, “Qaani sağdır, səhhəti yaxşıdır və fəaliyyətini davam etdirir.”