BAKI,AzerVoice, Nailə Babazadə

İran tərəfi Avropa İttifaqının (Aİ) İslam İnqilabı Keşikçiləri Korpusunu (SEPAH) terror təşkilatları siyahısına daxil etmək qərarına sərt reaksiya verib.

AzerVoice xəbər verir ki, İran mətbuatında yer alan xəbərlərə görə, ölkənin Xarici İşlər Nazirliyi etiraz əlaməti olaraq Aİ-yə üzv ölkələrin Tehrandakı bütün səfirlərini nazirliyə çağırıb.

Səfirlərlə bazar və bazar ertəsi günləri keçirilən görüşlərdə Avropa İttifaqının qəbul etdiyi qərar qətiyyətlə pislənilib. Nazirlik rəsmiləri bildiriblər ki, SEPAH-ın terror siyahısına salınması beynəlxalq hüquq normalarına və Birləşmiş Millətlər Təşkilatının (BMT) nizamnaməsinə tamamilə ziddir. Görüşdə bu addımın İran xalqına qarşı təhqir kimi qiymətləndirildiyi vurğulanıb.

İran rəsmiləri həmçinin qeyd ediblər ki, İslam İnqilabı Keşikçiləri Korpusu ölkənin milli təhlükəsizliyinin təmin olunmasında mühüm rol oynayır. Onların fikrincə, Avropa İttifaqının bu qərarı beynəlxalq sülhə və hüququn aliliyi prinsipinə ciddi zərbə vurur.

Xatırladaq ki, Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaja Kallas bir müddət əvvəl sosial media hesabından etdiyi paylaşımda İran ordusunun bir hissəsinin terror təşkilatı kimi tanındığını elan etmişdi. Kallas bu qərarı İrandakı daxili təzyiqlərin cəzasız qala bilməyəcəyi ilə əsaslandırmışdı.