BAKI, AzerVoice, Nailə Babazadə

İsrailin Qəzza Zolağına humanitar yardım aparmaq üçün yola çıxan Əzm Donanması hücumundan sonra dünyanın dörd bir tərəfində etiraz aksiyaları keçirilir.

AzerVoice xəbər verir ki, Türkiyənin bir çox şəhərində donanmaya dəstək aksiyaları keçirilərkən, İtaliyada bəzi həmkarlar ittifaqları donanmanın qarşısının alınmasını əsas göstərərək ümumi tətil elan edib. Bir çox şəhərdə qatar reysləri ləngiyib, liman işçiləri gəmi hərəkətini əngəlləyib. Milan şəhərində təxminən 20 min nəfər hücumu etirazla qarşılayıb, paytaxt Roma və Turin şəhərlərində də minlərlə italyan əlində Fələstin bayraqları ilə küçələrə çıxıb.

İspaniyanın 35 şəhərində isə minlərlə tələbə dərsləri boykot edərək meydana çıxıb və İsraili etirazla qarşılayıb. Tələbə Həmkarlar İttifaqının “Fələstin xalqına qarşı soyqırımı dayandıraq” çağırışına cavab olaraq minlərlə tələbə dərs buraxma aksiyasına qoşulub. Ölkə miqyasında keçirilən aksiyaların ən böyüyü 4 mindən çox insanın iştirak etdiyi paytaxt Madrid şəhərində baş tutub. Fələstinə dəstək və İsrailə qarşı etiraz aksiyalarının həftə boyunca davam edəcəyi gözlənilir. Bu gün də İspaniyada müəllimlər dərs buraxma aksiyasına qatılacaq.

Niderlandın Haaqa şəhərindəki Xarici İşlər Nazirliyinin qarşısında toplaşan Fələstin tərəfdarı qruplarla polis arasında gərginlik yaşanıb. Braziliyanın Rio-de-Janeyro və Slovakiyanın Bratislava şəhərləri də dünənki etiraz aksiyalarının mərkəzlərindən olub.

İtaliyada bəzi həmkarlar ittifaqlarının tətil elan etdiyi bir çox şəhərdə İsrail əleyhinə etiraz nümayişləri keçirilib. Milan şəhərində də təxminən 20 min nəfər Fələstinlə həmrəylik və İsrailə etiraz məqsədilə küçələrə axışıb.