BAKI, AzerVoice, Nailə Babazadə

HƏMAS, İsrailin mühasirə və hücumları altındakı Qəzza zolağına humanitar yardım aparmaq üçün yola çıxan Əzm Flotiliyasına İsrail ordusunun hücumunu pisləyib.

AzerVoice xəbər verir ki, HƏMAS tərəfindən yayımlanan açıqlamada, İsrail ordusunun Qəzzaya yardım çatdırmaq məqsədilə yola çıxan Əzm Flotiliyasındaki gəmilərə hücum etməsi, aktivistləri və jurnalistləri saxlaması "xəyanətkar hücum, quldurluq cinayəti və terror aktı" kimi qiymətləndirilib.

Açıqlamada bildirilib ki, İsrail artıq 2 ildir Qəzzada soyqırım və aclıq siyasəti yürüdür və mühasirədə olan fələstinlilərə təcili humanitar yardım çatdırmaq üçün yola çıxan donanmadakı gəmilərə və beynəlxalq aktivistlərə hücum, "işğalçı İsrailin cinayətlər siyahısına əlavə olunub."

Açıqlamada həmçinin donanmada iştirak edən aktivistlərin cəsarəti və fələstinlilərə qarşı tətbiq edilən mühasirəni qırmaq əzmi alqışlanıb, "dünyanın azad xalqları" İsrailin donanmaya hücumunu qınamaq üçün aksiyalar keçirməyə çağırılıb.

BMT və beynəlxalq ictimaiyyətə ünvanlanan çağırışda isə, İsrailin bu hücumunun qətiyyətlə qınanması, donanmadakı aktivistlərin qorunması, Fələstin xalqına qarşı həyata keçirilən soyqırım və aclıq siyasətinə son qoyulması tələb olunub.

Xatırladaq ki, 40-dan çox gəmidən ibarət və 500-ə yaxın iştirakçını əhatə edən Qlobal Əzm Donanması İsrailin Qəzza blokadasına qarşı ən böyük mülki müqavimət təşəbbüslərindən biri hesab olunur. Çərşənbə günü axşamı İsrail qüvvələri beynəlxalq sularda 13 gəmini ələ keçirərək 37 ölkədən 200-dən çox şəxsi saxlayıb. Hadisə dünya miqyasında etirazlara və diplomatik gərginliyə səbəb olub.