BAKI, AzerVoice, Nailə Babazadə

İsrail ordusunun Qəzza zolağının müxtəlif bölgələrinə təşkil etdiyi son hücumlarda 10 fələstinli həlak olub.

AzerVoice xəbər verir ki, xəstəxana mənbələri və hadisə şahidlərinin verdiyi məlumata görə, İsrail ordusu bu gün səhər saatlarından etibarən Qəzza zolağında köç etməyə məcbur edilən fələstinlilərin sığındığı çadır və evlərlə yanaşı, mülki şəxslərin toplandığı əraziləri də hədəfə alıb.

İsrailə məxsus pilotsuz uçuş aparatı Qəzza şəhərinin qərbində yerləşən Ənsar qovşağı yaxınlığını hədəfə alıb və nəticədə bir uşaq həyatını itirib. Eyni zamanda şəhərin müxtəlif məhəllələrində şiddətli bombardmanlar və ardıcıl partlayışlar baş verib.

İsrail ordusu şəhərin cənubundakı Sabra və Tel əl-Həva məhəllələrində, həmçinin şimal-qərbindəki Şeyx Rıdvan və Nəsr bölgələrində onlarla evi partlayıcılarla dağıdıb və havaya uçurub.

Bu hadisələr xüsusilə şəhərin qərbindəki Nəsr və Şifa küçələrində, İsrailin quru hücumları istiqamətlərində, güclü hava bombardmanları, ağır pulemyotlar və artilleriya atəşi ilə eyni vaxtda baş verib.

İsrail ordusunun Qəzza zolağının mərkəzindəki Bureyc qaçqın düşərgəsinin şimalını hədəfə aldığı hücumda 4 bacı-qardaş həyatını itirib.

İsrailin hücumları, çox sayda didərgin fələstinlinin yerləşdiyi Deyr əl-Bələh şəhərinə yönəlib.

Deyr əl-Bələhdəki Əbu Arif bölgəsində mülki şəxslərin toplandığı əraziyə təşkil edilən PUA hücumu nəticəsində 1 fələstinli həlak olub, çox sayda insan yaralanıb.

Şəhərin qərbində yerləşən Meşalə bölgəsində köçkünlərin sığındığı bir çadır da İsrail ordusu tərəfindən hədəfə alınıb. Bu hücumda, bir qadın da daxil olmaqla, 3 nəfər həyatını itirib.

Xan Yunusun cənubundakı Tine küçəsində yardım gözləyən insanlara atəş açılması nəticəsində 1 fələstinli qadın öldürülüb, bəziləri isə yaralanıb.

Bundan əlavə, Xan Yunusun qərbindəki Məvasi bölgəsində yerləşən Əl-Əqsa Universitetinin kampusunda müvəqqəti məskunlaşan köçkünlərin qaldığı çadırlar İsrailin hücumuna məruz qalıb. Hücum nəticəsində çox sayda fələstinli yaralanıb.