BAKI, AzerVoice, Nailə Babazadə

İsrailin Baş naziri Benyamin Netanyahu, işğal altındakı İordan çayının qərb sahilində (Qərbi Şəriə) yaşayan fələstinlilərin ölkədən çıxmaq üçün istifadə etdiyi yeganə sərhəd qapısını bağlayacağını açıqlayıb.

AzerVoice xəbər verir ki, İsrail ordu radiosunun müxbiri Doron Kadoş xəbərində, Netanyahu-nun bu qərarı bir çox ölkənin Fələstin dövlətini tanımasına etiraz olaraq verdiyini bildirib.

Məlumata görə, Netanyahu işğal altındakı Qərbi Şəriədən İordaniyaya çıxışı təmin edən və İsrailin nəzarətində olan “Kral Hüseyn Körpüsü” sərhəd keçid məntəqəsinin insan və yük daşımalarına növbəti xəbərdarlığa qədər tamamilə bağlanması barədə göstəriş verib.

Bu sərhəd keçidi, Qərbi Şəriədə yaşayan fələstinlilərin xarici dünyaya çıxmaq üçün istifadə etdiyi yeganə yol olmaqla yanaşı, Fələstin Muxtariyyətinin yüksək rütbəli rəsmilərinin də İordaniyaya keçmək üçün istifadə etdiyi bir nöqtədir.

Qeyd edək ki, İsrailin bu sərhəd keçidində tətbiq etdiyi özbaşına qaydalar, uzun növbələr və keçid problemləri Fələstin rəhbərliyi tərəfindən daim tənqid edilir. Keçid ötən həftə iki israilli əsgərin həlak olduğu hücumdan sonra müvəqqəti bağlanmış, daha sonra yenidən açılmışdı.